Tur morto di Covid19 despues di 1 juni 2021 ta hende no vacuna

ORANJESTAD – Un grafico di Crisis Team presenta diahuebs anochi ta mustra cu tur e mortonan di Covid19 despues di 1 di juni 2021 ta hendenan cu no a vacuna contra e vacuna. Si tabatin cualkier duda cu vacuna ta e forma mas miho pa yuda combati e coronavirus of Covid19, e grafico aki a comproba esey. Por lo menos esey tabata e pensamento di hopi usuario, despues di a tuma nota di e grafico presenta. Loke e grafico ta haci ta presenta tres diferente situacion, unda cu loke ta resalta, ta cu esnan mas afecta den e pandemia awor, ta esnan no vacuna.

E GRAFICO

E grafico ta cuminsa na mustra e cantidad di persona cu a keda interna na hospital despues di 1 di juni 2021. Aki 84% ta esnan cu no tabata vacuna, contra 16% di persona cu si tabata vacuna, cu por lo menos 1 shot. E di dos ilustracion ta mustra e cantidad di persona cu a keda interna den ICU (Dept di Cuido Intensivo) di hospital despues di 1 di juni 2021. Aki 93% di esnan interna den ICU no tabata vacuna, mientras cu 7% di esnan interna den ICU tabatin por lo menos 1 shot di vacuna. Y finalmente, e ilustracion cu ta mustra e cantidad di morto a consecuencia di Covid19 registra despues di 1 di juni 2021, ta mustra cu 100% tabata esnan no vacuna. Pues tur morto di Covid19 tabata exclusivamente hendenan cu no a vacuna.