Pandemia di COVID a tranca reorganisacion y renobacion di Arubahuis

DEN HAAG – E pandemia di COVID a tranca reorganisacion y renobacion di Arubahuis. Asina actual Minister Plenipotenciario demisonario, sr. Guillfred Besaril a informa diahuebs. Pa loke ta trata e tema di reorganisacion di Arubahuis, e mandatario a indica cu esaki ta cla pa wordo ehecuta. “No a implemente ainda pa motibo cu e pandemia di COVID-19 y tur e esfuerso pa yega na un acuerdo cu Hulanda na bienestar di Pais Aruba a haña preferencia riba e tema aki. Mescos a conta pa loke ta e tema di renobacion di e edificio den R.J. Schimmelpennincklaan. Aña pasa nos mester a scohe entre pone e fondonan disponibel pa renoba e edificio of uza loke tabata tin den caha di Go-bierno na bienestar di Pueblo di Aruba. Na momento cu Aruba cuminsa sali for di e temponan dificil cu e ta pasando aden, e tema aki lo por bolbe bek riba mesa” asina Minister Besaril a indica.

ABN AMRO

“Mescos cu den e caso di ING y Rabo Bank, ABN tambe a hañe den un percance pa su forma di opera. Esaki a conduci cu ABN AMRO awor a dicidi na bini cu un maneho nobo pa tur su clientenan p’asina por cumplí cu e reglanan nobo cu a wordo stipula pa nan. E proceso cu Arubahuis como cliente ta pasando aden, ta tur cliente cu ABN AMRO ta considera grandi y/of importante, ta pasando aden” e mandatario a sigui bisa.

Un otro punto cu Minister Besaril lo ta desea na aclarea ta e asunto di tanto e edificio di Arubahuis, como e “ambtswoning” di Minister Plenipotenciario. “Pa loke ta e ambtswoning, DOW Aruba a bini Hulanda prome cu e pandemia di COVID 19 pa hasi un control riguroso y traha rapport tanto pa Arubahuis como e ambtswoning. Ambos edificio ta den mal estado. E ambtswoning tin entre otro problema serio di riolering y e bario den cual e ta encontra su mes a bai hopi atras si compara esaki cu 10 pa 20 aña pasa. E ultimo añanan e bario a hañe confronta entre otro c’un cantidad alarmante di casonan di kiebro den cas y di hobennan problematico. E mantencion di ambos edificionan nunca tabata structura y a laga hopi di desea. Esaki a pone cu apesar cu por inverti y drecha e ambtswoning, DOW a yega na e conclusion cu e costo lo ta asina halto cu ta sugeri pa tuma un otro decision cu e ambts-woning”. 

“Na momento di a asumi e responsabilidad di maneha Arubahuis na 2017, mi a encontra un organisacion cu tabata sclama p’e haña e atencion debido. Un situacion cu a traha duro riba dje. Tin puntonan cu nos a logra trece e cambio y trankilidad necesario, pero tin otro puntonan cu pa motibo di e pandemia di COVID 19 no a logra na atende cunan pa trece un solucion satisfactorio y di largo plazo. Por ultimo mi mester bisa cu mi a bin Aruba pa e campaña politico di 2021 y e siman aki mi ta cumpli 3 luna riba mi dushi isla. Mi ta contento cu den e periodo aki mi yiu a nace aki na Aruba, mescos cu su mayornan y na e momentonan aki e mundo politico Hulandes ta den pleno reseso. Pues mi presencia na Aruba no ta perhudica niun hende”, asina Minister Besaril a termina su declaracion.

Nota pa redacion: E potret ta cortesia di Cas di Aruba