KVK: Un Shopping Mall na Sero Colorado y otro den centro di San Nicolas ta di mas

ORANJESTAD – E hecho cu tin plan pa tin dos centro comercial (na) grandi pariba di brug (uno den centro di San Nicolas y otro na Sero Colorado den proyecto Bahia Principe) , por bira un problema, y no ta e miho forma di proceder. Asina director di Camara di Comercio Leo Maduro a bisa e siman aki. E ta referi na un master plan di 4 aspecto grandi pa San Nicolas cu tin cu gara den otro. Aki Maduro ta papia di un desaroyo nobo di e tereno di e refineria Valero, e centro comercial di San Nicolas cu mester revitalisa e centro, e resto di San Nicolas (cu despues di 30 aña di deterioro segun Maduro, mester un upgrade), y di e tereno di Sero Colorado unda cu tambe varios tipo di desaroyo economico lo tuma lugar. Maduro ta referi aki pues na e hotel all inclusive, Bahia Principe, cu a anuncia cu nan tambe lo bin cu un centro comercial grandi pa e hotel. Y ta den e contexto aki, como un ehempel, Maduro a splica e problema di e ‘malnan’ aki.

SHOPPING MALL

Maduro a splica cu e la tende pues di e intencion pa crea un shopping mall grandi den Sero Colorado’ (tambe). “Esey ta masha bunita. Pero si na mesun momento un tiki mas pabou den e centro comercial di San Nicolas mes bo kier revitalisa esey (tambe), bo ta papiando aki di un contradiccion” Maduro ta bisa, pasobra segun e director di KvK, no tur negoshi cu ta bay den e shopping mall na Sero Colorado ta bay den e centro di San Nicolas mas. “Anto esey ta e contradiccionnan di e modelo di desaroyo cu bo kier discuti cu gobierno”, Maduro a bisa.

REACCIONA DI DESAROYADONAN

Aña pasa ora cu e plan di Sero Colorado (Bahia Principe) a wordo presenta, NoticiaCla.com a confronta tanto e desaroyado nan como e minister di turismo riba e punto aki. Aki a wordo sigura cu e lo no mester ta un problema pa tin dos mall, ya cu uno ta complementa e otro. Pues contrario na loke cu Maduro ta bisa, tur cos lo ta ‘ok’.

COMBERSACION CU MINISTER

Bek pa e director di kvk, Leo Maduro, finalmente e la bisa si cu tin un combersacion pendiente ainda cu minister di Asuntonan Economico. Esaki ta necesario segun Maduro, pasobra esey ta e tipo di contradiccionnan den e modelo total cu bo tin cu elimina pa bo tin un desaroyo coherente di actividadnan economico cu ta pas cu otro. “Nos ta spera cu pronto nos por tin e combersacion aki” Maduro a sigura. NOTA: E foto di archivo ta di e shopping mall di Bahia Principe na Cancun Mexico.