Vroegop: HOH tin solamente lugar pa 2 pashent mas den ICU

ORANJESTAD – E departamento di Cuido Intensivo di Hospital Horacio Oduber (HOH) miho conoci como ICU (Intensive Care Unit) tin lugar pa 2 pashent so mas! Y esaki ta cualkier tipo di pashent, pues no solamente pa Covid19. Asina e director di HOH Jacco Vroegop a describi e situacion pa noticiacla diaranson atardi. “Di otro banda, nos lo no djis stop di yuda hende y lo haci tur cos pa yuda hende, cu ta encera tambe anticipa tempran pa manda hende pa Colombia” e director a sigui bisa.  

ICU TA CASI CASI YEN

E director a sigui splica e situacion frustrante: “Hospital (actualmente) tin 40 pashent di Covid19, di cual 5 ta riba ICU. Riba ICU tin 3 pashent tambe cu no ta pashent di Covid19” e director a sigui bisa. “Nos tin solamente espacio pa 10 (pashent), mirando e capacidad di e personal”. Esaki kier men cu tin espacio pa solamente 2 pashent mas.  

PROBLEMA DI ACCIDENTE

E director ta mustra cu e problema cu tin, ta cu e ICU (departamento di cuido intensivo) no ta yen cu solamente pashent cu tin Covid19, sino pa otro motibo. “Ta fastioso cu tin hopi (pashent) di accidente, -sea pa (motibo di) alcohol of coremento malo. Y bo mester mantene. E capacidad habri tambe pa personanan cu trauma, paro cardiaco of derame cerebral. Pues bo no por tin tur cama yen” Vroegop ta sigui bisa. “Pa un hotel esey ta fabuloso. Pa un hospital esey ta un mal señal y pa planificacion den caso di un disaster”. 

POR  ATENDE AINDA

E director ta mustra cu ainda hospital ‘por’ maneha e situacion, pero esaki ta solamente pasobra ta ‘bezig’ ta trasladando pashentnan di Covide19 pa Colombia, manera cu e portal aki a raporta anteriormente cu e siman aki lo a manda mas pashent mas pa Colombia. Y debi cu varios medico ta cu vacacion, operacionnan no ta tumando lugar, y finalmente, pasobra nos a reduci parti di e servicio regular” Vroegop a sigui bisa. Ademas, e personal di enfermeronan y dokternan presente ta trahando mas duro, yudando mas hende cu ta normal segun reglae pa toch por tin e cuido necesario. “Esaki ta critico si” e director ta continua bisando. “Nos ta purba yuda otro tambe den region mes. Corsou a manda un docter di pulmon, y nos a manda aparato di hala rosea pa St Maarten”.

HENDE VS CAMA

E ta splica cu porta enberdad nan tin suficiente cama awor, pero e problema ta scarsedad di personal. Esaki pasobra cada cama ta rekeri un cantidad minimo di personal pa atende. E diferencia di prome cu awor, ta cu den e di 2 y 3 ola (red: actualmente nos ta den e di cuater ola), a maneha e situacion bon pasobra tabatin personal extra di Hulanda y di e organisacion AMI. “E personal ey casi no t’ey mas y nos propio personal no ta suficiente. Nos ta trahando si cu e directiva nobo pa inverti pa por educa personal nobo, pero esey ta dura 1 pa 3 aña prome cu e por tin resultado. Pa por acapara e escases y resolve e problemanan actual, echt nos mester di mas hende. Nos por a contrata mas hende pero no suficiente. Y e placa simplemente no tey. Y AZV ta sigui corta riba nos presupuesto y otro organisacionan no por of kier presta nos personal temporalmente” e director a bisa finalmente. Na final, e ta mustra cu e situacion ta uno hopi pero hopi serio na hospital.