Corte: No tin reconteo di votonan di e eleccion Parlamentario 2021

ORANJESTAD – No ta permiti reconteo di votonan di e ultimo eleccion Parlamentario di Aruba. Asina huez a dicta diaranson den su sentencia den e caso cu tres ciudadano di Aruba miembro di partido politico AVP a entama. Ta trata aki di Arthur Dowers, Mike de Meza y Mervin Wyatt Ras. Cu esaki, corte a rechasa e peticion di tres ciudadano miembro di partido AVP. Un eventual reconteo cu un resultado diferente di eleccion, lo por a cambia e panorama por completo segun e demandante.  

E CASO

Mientras cu e caso tabata entama pa tres miembro di partido AVP contra pais Aruba, a usa sr Dowers como persona principal den e caso aki. Segun e argumento di Dowers, e motibo di e reconteo ta pasobra den 11 ultimo eleccion, e cantidad di voto invalido tabata esun di mas grandi te awor. Ademas, cu e informacion cu nan tin, si e reconteo demostra y comproba e informacion, ta nifica cu 53 voto invalid ta bira valido na fabor di partido AVP, cu ta nifica cu un restzetel cu a bay pa partido MEP, ta bay pa partido AVP cu consecuencia cu e panorama electoral ta cambia completamente. E ora e ta bira AVP y MEP ambos cu 8 asiento, envez di MEP 9, y AVP 7 manera e ta aworaki. 

ARGUMENTO

Huez a repasa e argumentonan y a mustra cu mayoria di e ponencianan di Dowers no ta valido. Un punto cu a bay hopi extenso ariba, ta e presentacion di pruebanan entrega pa Dowers y partido, esta fotonan cu ta mustra fayonan di e voto. Huez a sali di punto di bista cu saca potret di voto, ta illegal y ta violacion di ley. Esaki pasobra votamento mester ta secreto. E la bay basta extenso riba e uso di e potretnan aki y e validez di e potretnan. Y mirando cu por considera cu esaki tabata un parti grandi di e defensa, no usando e pruebanan aki ta debilita e caso aki pa e partido en cuestion. Ademas, huez ta evalua kico e chensnan ta di e partido en cuestion si e bay den un caso di profundidad (bodem procedure) y si tin chens aki di gana. Y segun e huez, esaki no ta e caso. Sigur no pa e asina yama ‘voorlopige voorziening’. Como tal ta rechasa e peticion di e grupo lidera pa sr Dowers. Lesa e sentencia completo AKI.