ATA: Pa Añanan 2022 y 2023 Aruba por ricibi barconan crucero tipo ‘Class’

ORANJESTAD – Pa añanan 2022 y 2023 Aruba por spera di ricibi barconan crucero manera e Quantum Class y e Oasis Class di RCCL cual ta e barconan mas nobo di e linea crucero aki pero desde 2019 tambe ta wordo considera como e barconan crucero mas grandi di mundo. Asina e delegacion di Aruba cu recientemente tabata na Miami pa reuni cu liñanan crucero a bin tende. 

PRODUCCION BIYONARIO 

Segun oficina di turismo di Aruba, turismo crucero a bira mundialmente un parti esencial den e industria di turismo cu globalmente ta produci un average di US$ 29.4 biyon pa aña y mas cu 19 biyon pasahero. Resultado di BREA (un compania internacional cu ta midi cuanto turistanan crucero ta laga atras den economia) ta mustra den nan raport di 2018 cu e turistanan ta laga un promedio di US$ 121.94.- pa persona pa cada destinacion atras.

AÑA 2019

Pa Aruba na aña 2019 un total di 823.001 turistanan crucero a bishita nos isla riba un total di 324 diferente barconan crucero. Ta bon pa menciona cu pa 2021,lineanan di crucero manera RCCL (Royal Caribbean Cruise Lines) y CCL (Carnival Cruise Lines) ta registrando gradonan di satisfaccion mas halto bao nan pasaheronan compara cu prome cu e pandemia. Alaves e cantidad di placa cu e pasaheronan crucero ta gastando den e destinacionan tambe a subi.