AHATA: No ta sorpresa cu CDC a hisa e nivel di alerta pa Aruba

ORANJESTAD - Cu e brote grandi di casonan positivo di COVID na Aruba, no ta sorpresa cu CDC a hisa e nivel di alerta pa Aruba. Asina CEO di AHATA Tisa LaSorte ta bisa como prome reaccion riba e alerta ‘nobo’ di Merca pa Aruba. Segun LaSorte,  ta mucho trempan pa confirma kico exactamente ta e efecto di e alerta riba nos economia. “ Pero ta logico cu nos por experiencia mas cancelacion den turismo. Especialmente di gruponan” LaSorte a bisa. E problema no ta e nivel di alerta segun LaSorte, sino e brote di casonan di COVID. Cu e variante Delta, e virus ta plama hopi mas liher, y ainda tin demasiado hende cu no ta skohe di proteha nan mes. Ni cu vacuna ni cu disciplina di medida. Mientrastanto, e peliger grandi no ta solamente e efecto riba nos economia, pero tambe riba e disponibilidad di cuido medico na hospital.