Grupo di 7: Gobierno mester retira

ORANJESTAD – Minister presidente interino Mike de Meza a acepta e tres cartanan di e Grupo di 7, diabierna atardi dilanti Bestuurskantoor. Pidi despensa na gobernador, baha gobierno y contesta e ultimo carta cu e grupo di 7 a entrega ultimo protesta, tabata e exigencianan di e grupo diabierna atardi. Entre 300 pa 350 hende a participa na e marcha for di Juliana School, y yega na Bestuurskantoor banda di 5:45pm. Segun e lider Rocky Kelly na NoticiaCla, nan ta satisfecho cu e loke nan a haci diabierna, y ta spera cu gobierno duna oido na nan peticionnan cu nan a haci. Un total di 3 carta entrega, di cual tur mester di un contesta, pero na su debido tempo. “Minister de Meza a tuma e cartanan y drenta bek. Nos no tin problema cu esey pasobra e tin cu bay delibera cu su hendenan awo” Rocky Kelly a finalisa bisando NoticiaCla