Gobierno investigando si otro companianan semi estatal tambe ta viola areglo manera WEB a haci

ORANJESTAD – Prome minister di Aruba Evelyn Wever a laga puntra companianan semi estatal di Aruba manera Setar y Aeropuerto si ta berdad cu nan tambe ta practicando e tipo di maneho manera WEB, esta cu ta ‘violando’ e palabracion haci cu Hulanda di retene 12.6% di salario manera conbini cu Hulanda. Asina e mandatario a bisa dialuna durante un conferencia di prensa. E mandatario ta confirma cu na WEB e asunto tabata asina pero ora cu a confronte cu e posibilidad cu na Aeropuerto y Setar tambe posiblemente tin practica asina, e mandatario no por a confirma pero a sigura cu ta bay investiga y lo laga sa unabez cu esaki ta cla. A bisa siman pasa cu e hecho cu WEB a dicidi riba nan mes pa cambia e areglo di retencion di 12.6% di salario pa 6%, esaki a trece Aruba den hopi problema cu Hulanda debi cu Aruba no ta cumpliendo. Y cu incumplimento, Hulanda por para e ayudo financiero cu tanto Aruba tin necesidad di dje.