Director di CDC: Si no tuma medida, mester pone tent pafo y hende lo muri den porta di CMC

WILLEMSTAD - Gilbert Martina direktor di Curaçao Medical Center (CMC) a haci un yamada dramátiko ayera y ta spera ku e momentu no mester yega ku no por tuma pashènt mas den CMC, mester tuma akshon pa limitá kontagio.

Den un deklarashon ku karakter di urgensia i dramátiko i un yamada pa gobièrnu hasi algu, a trese basta preokupashon ayera ora ku Direktor di Curaçao Medical Center Sr. Gilbert Martina a ekspresá su preokupashon.

Martina a indiká ku ta trata aki di un situashon serio ku CMC ta aden i si kos sigui manera e ta bayendo awor aki, kaminda ku no tin niun akshon tumando lugá pa mitigá e chèns pa sigui plama e infekshon, lo yega e momentu ku no por tuma pashèntnan mas na CMC pa motibu ku no tin mas lugá.

Martina a bisa ku e situashon ta realmente alarmante i na e momentunan aki no tin niun medida, manera un toke de keda, pero loke ku por opservá ta ku fiestanan ta sigui tuma lugá normal i aglomerashon ya a bira manera normal.

Mirando e kantidat di hendenan ku ta yega CMC por bisa ku hospital ta praktikamente yen. Esaki ta pone un preshon enorme riba e trahadónan di CMC ku ya ta agotá, miéntras ku  no tin personal sufisiente pa garantisá e kuido. E personal ta asta mentalmente kansá i por mira kon baliamentu ta sigui tuma lugá normal.

Mirando kon e último siman nan a bai, CMC ta teme pa loke ta bai pasa aki dos siman. Manera menshoná, e momentu lo yega ku nan lo no por bai tuma niun pashènt mas, loke ku CMC no ta deseá pa yega na e punto ku lo mester pone tènt pafó i laga hende muri den porta di CMC.

Martina ta lamentá ku mester a para operashonnan elektivo, pa motibu di situashon ku tin aktualmente. Despues di a traha duru pa baha e hendenan ku tabata riba lista di espera pa operá, awor mester para operashonnan.

P’esei Martina ta hasi un yamada dramátiko na Gobièrnu pa tuma medida  pa limitá moveshon di hende riba kaya, pa motibu ku e forma kon e komunidat aki ta move, ta parse ku Kòrsou no tin Covid-19.

Te ku ayera anochi no tabatin niun desaroyo pa ku palabrashon kon pa yuda CMC ku trahadónan di kuido. NOTA: E texto ta skirbi den Papiamento fonetico di Corsou.