Dick Drayer riba su contagio cu Covid19: " Si mi no a vacuna, mi lo no a sobrevivi esaki!"

PHILLIPSBURG – “Si mi no a v acuna, mi ta sigur cu mi lo no a sobrevivi esaki”. Na palabra, periodista Dick Drayer na St Maarten awe mainta, despues di a wordo traslada via helicopter medico for di Statia. Dos dia prome el a test positivo pa COVID19, na su yegada riba e isla, cla pa haci un raportahe. E ironia ta cu el a bin e isla netamente pa raporta riba Covid y su chens pa un posibel brote. Ironia ta cu e ta e prome victima di Statia, cu a pone cu mesora a activa e crisis team, pasobra ta spera mas caso awor. 

DICK MES

Pa loke ta Dick mes, inicialmente e tabata trankil pasobra esaki lo a bay bon, pensando cu e ta protegi debi cu la vacuna dos biaha. Sinembargo durante curso di dia cos a empeora y el a bira mas malo. Problema cu rosea tabata un di e hopi aspectonan, fuera cu e tabata sinti un griep pisa. Ya anochi cos a bira problematico unda cu e la haya problema respiratorio. Diasabra mainta trempan e team medico a reuni y a opta pa traslad’e pa St Maarten pa haci mas test, incluyendo un CT scan. Dick Drayer ta diabetico pues no kier a tuma ningun riesgo ya cu e ta cay den e ‘grupo di riesgo’. Rumor cu un long ya no ta traha, no ta completamente corecto. “Nan ta investigando ainda y kier evita un long emboli’. Esaki ta un prop di sanger cu por yega na e curason y rementa causando morto. “Si no ta pasobra mi tabata vacuna, mi lo no a sobrevivi esaki sigur” Dick ta bisa noticiacla diasabra atardi. E ta mustra na pashentnan rond di dje cu tin Covid19 pero cu no a vacuna, y cu nan situacion como tal ta mucho mas problematico. E tin tur speransa si cu e lo sali for di episodio aki den un forma positivo. Mes momento el a sugeri pa tur hende sigui vacuna, pasobra esaki ta mehora bo chensnan grandemente di sobrevivi e malesa aki, sigur si bo ta cay den e grupo di persona cu risico.