Premier Wever na Benny Sevinger: “Ami ta drumi tur anochi cu mi wowo cera pasobra mi consenshi ta limpi”

ORANJESTAD – “Ami ta drumi tur anochi cu mi wowo cera, pasobra mi consenshi ta limpi’. Apenas algun rato despues cu noticiacla.com a publica e articulo cu reaccion di Parlamentario Benny Sevinger contra premier Evelyn Wever Croes, e prome mandatario a conteste riba su pagina di facebook personal. E Parlamentario cu a caba huramenta diabierna merdia laat, a laga un mensahe na final di su presentacion na prensa, unda cu ta bisa e premier pa e no drumi wowo cera pasobra ‘nan’ lo bati na su porta, refiriendo na ministerio publico. 

CONTESTA DI PREMIER WEVER

E contesta tabata liher y directo: “Na e “Parlamentario” sospechoso aki: ami ta drumi tur anochi cu mi wowo cera, pasobra mi consenshi ta limpi. Ami no a firma “dzz geen bezwaar”, ami no a duna tereno ni permiso na criminalnan sponsor di partido AVP, y ami no a hasi nada di loke e “parlamentario” aki ta wordo acusa di dje. Ora bo cana e caminda di integridad, bo ta drumi trankil cu wowo cera. Algo cu e “parlamentario” aki no ta compronde. I fear nothing for God is with me” e prome mandatario a contesta.