Bikker: Gobierno contento cu IMF, pero IMF kier mas medida

ORANJESTAD - PDR ta nota cu Gobierno di AVP ta di fiesta cu e rapport reciente di IMF, sinembargo e rapport ta bisa den punto 7 cu ta recomenda pa tuma ainda mas medida paso sino e debe nacional cu e Gobierno actual a redobla na mas cu 80% di GDP, lo sigui subi. Asina lider di e partido cora, Andin Bikker ta reacciona riba e rapport recien di IMF riba Aruba.

PUNTO 7

Segun Bikker, den punto 7 di e rapport preliminar di IMF ta para e.o. cu e hecho cu Aruba ta exponi na shocknan externo, su base economico ta smal, su cambio di moneda ta determina y e peso di pago di interes ta grandisimo, ta pidi pa creacion di mas espacio fiscal pa mehora resistencia contra shocknan. Den e cuadro aki mester corda cu CFT a bisa cu dor di e debe nacional asina grandi, Aruba su abilidad pa wanta mas crisis economico no tey mas. IMF pues ta re-afirma esaki. IMF ta sigui bisa den punto 7 cu e plan ambicioso di Gobierno pa coregi e deficit y baha e debe externo ta welcome, pero e ta remarca cu e objetivonan aki probablemente no lo wordo logra cu e medidanan actual so. Segun IMF sin medidanan adicional, deficitnan lo keda halto y e debenan lo keda subi riba termino mediano. IMF ta remarca cu establecimento urgente di un base fiscal fuerte y efectivo riba termino mediano lo haci e nivel di planan di Gobierno mas creibel. Pues, mescos cu CFT, IMF tambe tin su dudanan, na un manera diplomatico, den e nivel di crediblidad di e plannan di Gobierno pa reduci deficit y debenan en general. Y eigenlijk esaki ta netamente loke a hiba nos na e crisis actual y entrada di CFT: presupeustonan cu a wordo califica como irrealistico dor di Raad van Advies y finalmente confirma dor di CFT.

PUNTO 8

Mas aleuw den punto 8 di e rapport preliminar IMF ta remarca cu medidanan pa haya mas entreda pa Gobierno mester wordo tuma mirando e grandura di e ajustenan cu Gobierno tin plania. Particularmente IMF ta sugeri cu lo tin espacio pa hisa entradanan for di belasting indirecto. Segun IMF pa banda di gastonan, mirando e grandura di e payroll (50% di entradanan di belasting), un prioridad clave pa IMF ta pa introduci medida pa baha gastonan di payroll. Tambe segun IMF mas medida ta rekeri pa haci e aseguro general (AZV) financieramente independiente. Cu otro palabra IMF ta recomenda Gobierno den punto 8 di e rapport cu lo tin espacio hisa BBO (cual ironicamente Gobierno di AVP lo a keda di elimina), hisa e “health tax” (cu ta un otro nomber pa BBO) pa hasi AZV independiente financieramente, y basicamente bay corta den derechonan adkeri y/of subsidionan etc. (“entitlement reforms”).

Pues por conclui cu IMF ta un poco mas diplomatico cu CFT, pero na final tur dos ta riba mes un li?a: e grandura di debe nacional cu e propio Gobierno aki a redobla, endeudando generashonan, segun IMF y CFT ta rekeri aun mas medida pa wordo reduci y tin cierto duda den Gobierno su plannan actual pa logra esaki.

PLUIMPJE PASO A TUMA MEDIDA CONTRA PUEBLO

Gobierno a haya “pluimpje” den e rapport di IMF basa riba medidanan cu nan a tuma contra Pueblo, entre nan hisa edad di pensioen y introduci e “healthtax”. Sinembargo, hecho ta cu promer Minister a bay campa?a cu no ta bay tin medida, awo e propio Gobierno ta contento cu ela haya pluimpje di IMF pa impone medida riba Pueblo. Por conclui en todo caso cu e rapport no ta uno cu aspectonan positivo so manera Gobierno kier laga pasa, ja cu e preocupacionan serio constata pa CFT ta keto bay riba mesa.