Formador Wever: No tin problema cu proceso di screening pa minister

ORANJESTAD – “No tin ningun problema. E proceso ta andando” ta loke formador Evelyn Wever Croes a sigura e portal aki diabierna riba e pregunta di e portal aki riba e rumornan cu lo tin problema cu screening pa algun candidato pa minister. E rumornan ta bisa cu tin 3 candidato cu no por pasa e screening. E portal aki a puntra e formador si enberdad tin problema cu algun candidato cu a wordo postula pa bira minister. Pero formador a sigura cu ‘no tin problema of algo asina”. Awe merdia mientrastanto Gobernador Boekhoudt a duna formador Wever 3 siman mas di tempo pa por keda cla cu formacion di e siguiente gobierno, cu lo haya e signatura Gabinete Wever Croes II. 

DESAROYO

Segun e formador, nan ta den reunion cu stakeholders ainda, cu ta di importancia pa e acuerdo di gobernacion.” Esey ta e prome stap. Nos no ta full cla cu esey ainda” sra Wever a cuminsa na bisa. “ E di dos stap ta reparticion di carteranan entre Mep y Raiz. Esaki tampoco ta full cla” el a sigui bisa. Y despues lo ‘draag voor candidatonan pa minister. E mandatario a admiti cu e ta tumando mas tempo. “ E ta un proceso serio cu ta tuma tempo. Y ami kier tuma tempo pa esaki sino despues mi ta haya verwijt tambe si e bai mucho liher y oppervlakkig” e formador a continua.”  Pero no tin problema of algo asina” el a sigura e portal aki.