Anuncio publico di Banco Central riba eliminacion restriccion divisa

(ADVERTORIAL)

Teniendo cuenta cu e recuperacion continuo di Aruba su economia y e perspectivanan economico positivo, principalmente relaciona cu turismo, como tambe e hecho cu e reserva di divisa ta na un nivel adecua, Banco Central di Aruba (BCA) a dicidi pa sigui elimina e restriccionnan di divisa, tuma den e cuadro di e pandemia di Covid 19.

E decision di BCA ta lo siguiente:

Entrante 1 di augustus 2021 ta permiti atrobe pa haci pago na no-residente den cuadro di:

a.      Pago di dividendo y ganashi; y

b.      Inversion directo.

Inversion directo ta encera:

-        Participacion di un residente den un empresa den exterior;

-        Transferencia door di un compania local riba cuenta coriente di un asina yama moeder-, dochter of zustermaatschappij; y

-        Transferencia door di un compania local pa un cuenta bancario propio teni den exterior.

Cu e Anuncio Publico aki, BCA ta revoca e Anuncio Publico di 27 di maart 2020. Consequentemente, e Decreto encuanto divisa 2013/K.2 (permiso general di divisa) ta bolbe drenta na vigor entrante 1 di augustus 2021.

Cu excepcion di e cambionan den restriccion di divisa poni den e Anuncio Publico aki, como tambe esunnan anuncia dia 31 di mei 2021, BCA ta informa cu e Anuncio Publico di 17 di maart 2020 por lo demas ta keda vigente.

BCA ta sigui vigila e desaroyonan di e reserva di divisa hopi di cerca. Si esaki nan ta continua dentro di e margenan aceptabel, lo sigui elimina e restriccionnan di divisa ainda vigente.