Periodista cu a bay pa cubri Covid na Statia, a bira e prome victima di Covid riba e isla

ORANJESTAD – Un periodista cu a bay cubri un storia, a bira parti di e storia en cuestion e siman aki. Ta trata di e conocido periodista di NOS y colaborador pa Noticiacla.com, Dick Drayer cu ta residencia na Corsou. E siman aki el a bay e isla di St Eustatius pa cubri Covid19, of den e caso aki, e hecho cu no tin caso riba e isla. Y e tema tabata no si e isla lo haya un brote, sino ki dia. Pa su mala suerte, el a yega e isla y a resulta cu e ta positivo pa Covid19. Prome cu e la biaha pa e isla, el a test negativo, pero na e isla el a sinti su mes malo, y a bay test. Y aki a resulta cu enberdad el a test positivo. E mes ta haye hopi cinico (manera e mes ta describe e situacion), ya cu e ta prome persona cu ta introduci e virus riba e isla. Debi na esaki, e crisis team a bin hunto awe mainta y a cuminsa reuni, pasobra ta casi sigur cu lo tin mas hende cu tin e virus awor y cu tin cu prepara pa un eventual brote. Ta premira awor cu pa otro siman lo por tin mas caso. 

MALO

Pa loke ta e periodista mes, e ta vacuna cu tur dos dosis, pues e no ta kere cu e lo haye fuerte. Asina mes e ta sinti su mes hopi malo. Manera e mes a describe, nanishi ta core, keintura, dolor di weso, y sentimento pisa di griep. Menos mal cu el a tene un bon cuenta di kennan tur e tabata den contacto cu ne, pues e ‘contact tracing’ a bay facil segun e mes ta splica. E ta isola den su hotel aworaki, y ta contento cu por lo menos e bista cu e tin di e hotel, ta bunita. “Si toch bo mester ta den isolacion, esaki no ta un castigo e ora. E isla no (taba)tin Covid, y ta riba codigo berde. Pero si e grado di vacunacion ta hopi abou, cu ta pone e risico pa un brote hopi grandi. E intencion di Drayer, tabata pa conduci entrevistanan riba e tema aki ayera. Cu e pregunta pues, no si e isla lo haya un brote, pero ki dia. Cinico pues, manera e ta bisa. Lo mester warda mas largo awor pa e raportahe. Dick, beterschap!