RIVM: Islanan di Caribe Hulandes no a tuma suficiente medida pa frena Covid19

BILTHOVEN – E medidanan limita cu islanan di Caribe Hulandes a tuma, no ta suficiente pa frena e aumento alarmante di casonan di Covid19. Asina e rapport di Rijks Instituut Volksgezondheid en Millieu (RIVM) di e siman aki ta bisa. No ta conoci si RIVM ta referi na e 4 medidanan anuncia diahuebs atardi na Aruba, ya cu e raportahe di RIVM a keda publica diahuebs 7pm ora di Hulanda cu ta 1 or di atardi di Aruba. Corsou si no a tuma medida adicional y a anuncia p.e. diahuebs mainta cu nan ta djis ‘monitoria’ e situacion e weekend aki y ta depende despues si nan ta tuma medida. Pa loke ta RIVM, nan ta sigui bisa tambe cu e cantidad di contagio y hospitalisacion ta aumenta di un forma constante, y gran parti debi na e circulacion grandi di e variante Delta. Segun RIVM, esaki ta probablemente debi na e aumento di turista riba e isla ‘cu ta resulta den un interaccion social aumenta’. 

HOSPITALISACION

Si mitar di mei mas cu mitar di esnan interna pa Covid19 tabata di edad riba 60, esaki a bira dos di cada 5 persona. E aumento di cantidad ta den e grupo di edad entre 30 pa 39 aña. 

VACUNA

Pa loke ta esnan cu a keda contagia siendo cu nan tabata vacuna, e raport di RIVM ta mustra cu riba Aruba tin 23 contagio di hende cu a bira malo despues di mas di 14 dia cu nan a haya e prome vacuna. Di esakinan, 13% ta entre hendenan di 65 aña y mas bieu. Segun RIVM, esaki mirando e grado halto di vacuna y e circulacion di e variante delta, no ta un sorpresa.