Gobierno a re-introduci medidanan serio pa bringa Covid19

ORANJESTAD – “A yega asina leu atrobe!” tabata e forma con prome minister Evelyn Wever Croes a habri e conferencia di prensa diahuebs atardi riba e ultimo situacion di Covid19 na Aruba. E mandatario a describi e situacion cu tin, y despues a anuncia reintroduccion di medida contra Covid19 diahuebs atardi pa motibo di e situacion alarmante actual na Aruba. Y mirando cu a surpasa e drempel di 400 caso activo (e ta na 675 aworaki), a dicidi cu tabata necesario pa re-introduci medidanan contra Covid19. 

KICO E MEDIDANAN TA

Entre nan, tapaboca ta bira obligatorio atrobe den tur establecimento, horario di ciere di tur lugar ta bira 12’or mei anochi pa 6or di mainta, ta re-introduci gebiedsverbod entre 12’or mei y anochi y 6am riba tereno publico manera beach y parkinglot, y tin alcohol verbod riba propiedad publico henter dia. Tur e medidanan aki ta drenta na vigor entrante mei anochi 7 di augustus, esta diasabra awor. Lo tene e medidanan aki vigente pa 2 siman por lo menos. 

POLIS

Alto comisario di polis Vanessa Tjon a anuncia cu lo tin preventief foulleren un biaha mas debi cu e situacion ta saliendo completamente for di man. Polis lo ta vigilando constantemente e fin di siman aki y ta spera cooperacion di negoshinan nocturno. Polis lo wordo confronta cu e situacion di gebiedsverbod. 

PAKICO MEDIDA

Prome minister Evelyn Wever a splica e situacion pakico a resort na re-introduccion di medidanan mencona. Cu dos dia di riba 100 caso positivo di Covid19, a yega na un nivel mescos cu e tabata dia 1 di April unda cu tabatin 704 caso, y awor tin 675. Esnan cu ta hospitalisa tambe ta serio unda cu tin 90% cu no ta vacuna. A confirma cu 80% di e casonan di contagio, ta bin di e variante peligroso Delta.