Wever: WEB ta hincando gobierno di Aruba den problema serio cu Hulanda

ORANJESTAD – WEB su decision pa duna cierto compensacion na e trahadonan den dia di vacantie pa e reduccion di salario, ta hincando gobierno di Aruba den problema cu Hulanda. Esaki pasobra na WEB, e trahadonan riba decision di directive, no ta entregando 12.6% sino 6% di nan salario si calcula e compensacion di dianan di vacantie. “Esaki ta hinca mi den problema serio cu Hulanda manera bo por compronde” e prome mandatario di Aruba Evelyn Wever Croes a bisa diahuebs durante un conferencia di prensa. Segun e mandatario WEB tambe ta haya problema pero tambe henter Aruba. 

PAKICO PROBLEMA

E problema ta cu si Aruba no compli cu e exigencianan di Hulanda manera cu a keda palabra, Hulanda ta para e subsidio cu tin actualmente, y por dicidi cu Aruba no ta haya nada mas di placa. Aruba ainda no por para riba su mesun pia financieramente y ta dependiente di e ayudo aki di Hulanda. Si tuma paisnan bisiña manera St Maarten y Corsou, ora cu nan a ‘medio rebeldia’ y no cumpli, Hulanda no a basila y a para e ayudo financiero. Esey ta e situacion cu debi na e decision di directiva di WEB, Aruba por haya su mes den problema segun e prome mandatario. WEB tambe ta hinca den e Landenpakket, y ta un di e motibonan pa cual Hulanda a hinca esaki aden pa evita netamente cosnan asina di sosode den futuro.