Kock: Hendenan rond di Benny Sevinger mes a malusa di su confiansa

ORANJESTAD – Posibel maluso di confiansa di Benny Sevinger a pone cu e ta hinca den e situacion cu e ta aworaki. Asina abogado David Kock a bisa den e programa noticiacla Live diaranson cu periodista Tito Laclé. Mientras cu e ta para ariba ainda cu su cliente no a haci nada malo, e no ta kita afo cu “tin cosnan cu a pasa cu no mester a pasa y cu otronan lo a haci nan mes culpabel di irregularidadnan’. Asina   David Kock a sigui bisa. “Te ainda nos ta keda bisa cu sr Sevinger no a comete ningun delito. Den nos opinion, no tin prueba ainda di delitonan cometi” e abogado a bisa tambe. “Tin un par di nan (sospechoso) cu muy probablemente si a haci nan mes culpable na cierto delitonan”. Mes momento el a bisa cu como abogado di Sevinger, e tin cu wak pa su interesnan, pues no loke otronan a haci malo sino focus riba su cliente.

VARIOS COS A SOSODE CU NO MESTER A SOSODE

Ora cu a puntra e abogado un biaha mas si esey kier men cu e ta kere cu tin otro sospechosonan cu si a haci algo malo, e abogado a contesta:” Mi ta kere cu tin varios cos cu tin varios cos cu a sosode cu nunca no mester a sosode”, refiriendo na e contenido di loke tin awor na investigacion. Mes momento e ta bisa tambe cu ainda falta pa haya a dossier completo. 

ABUSO DI CONFIANSA

Un cos cu tambe a hala atencion ta e hecho cu segun e abogado, su cliente, esta Benny Sevinger a confia hendenan rond di dje den trabou y ey cos a bay robez. “Y  den esey, claramente su confiansa a wordo malusa”. Y esaki ta nifica cu awor el a haya su mes den problemanan cu e tin aworaki. E abogado no ta bisa si kennan tur e ta referi na dje, pero solamente a bisa ‘een goed verstaander heeft maar half woord nodig’ osea, ‘a buen entendedor, pocas palabras’ manera e dicho ta bisa na spaño. Por pensa p.e. riba su conseheronan, hendenan den su oficina cu e ta traha cune, di cual algun awe tambe ta sospechoso den e caso y cu por a abusa di su confiansa. 

HEKSENJACHT

Riba e pregunta cu si e abogado ta kere cu ministerio publico ta riba un asina ‘heksenjacht’ riba su cliente, abogado Kock ta ripiti e declaracion cu tin cosnan cu ‘cierto hendenan a haci cu no mester a sosode’. Pues cu e investigacion di OM riba e parti ey, por ta hustifica, y no ta considere un heksenjacht. “Pues den e sentido ey e no ta un heksenjacht”. “Pero pa ken tur kier pone bou di un guilotina, esey ta un otro pregunta” e abogado a bisa, indicando cu ta possible cu riba otro personanan. Ora cu a puntra specificamente si e ta considera loke cu OM ta haciendo, un heksenjacht, Kock a contesta cu loke cu OM ta hacienda contra su cliente ta ‘innecesario’.