Awe Crisis Team ta reuni pa ‘evalua mas medida’ atrobe contra Covid19

ORANJESTAD – Awe tardi Crisis Team den su reunion semanal di tur diahuebs lo determina si mester bin cu medidanan mirando e aumento explosivo e siman aki di casonan positivo di Covid19. Minister di salud Dangui Oduber a confirma cu durante e reunion ‘lo evalua mas medida’. Entre medidanan cu ta evaluando, ta p.e. tapaboca obligatorio atrobe. 

E CASONAN 

Segun resumen di ayera un total di 123 caso nobo di COVID-19 a keda registra cual 7 ta turista y 116 ta residente y 39 persona a recupera. E cifranan aki ta representa un 'Positivity rate' bou di nos residentenan di 33%. Cantidad di casonan activo di COVID-19 pa awe ta 630 y cantidad di fayecidonan relaciona cu COVID-19 ta 111.Datos ta ilustra subida continuo di casonan nobo cu un average semanal di 68 caso pa dia y un average di 'positivity rate' semanal di 28% pa dia cu ta sigui subi.