Director HOH ta lamenta cu su comentario a wordo malinterpreta

ORANJESTAD – “Nos ta felicita minister Oduber cu e ta comprometi cu e calidad y siguransa di mantene e calidad di cuido medico di Aruba”. Asina e director di dr Horacio Oduber Hospital, Jaco Vroegop ta cuminsa cu su reaccion pa noticiacla diaranson, riba e declaracion di minister Dangui Oduber den e portal aki di un dia prome. E director ta lamenta cu su comentario a wordo interpreta den un forma no positivo. Mes momento e ta sigura cu e relacion entre Hospital y gobierno di Aruba (lesa: minister Dangui Oduber) ta hopi bon. Esaki ta un tono diferente di loke el a declara anteriormente, den e articulo di Caribisch Netwerk unda cu e ta mustra su preocupacion cu e introduccion di AruBig. 

ARTICULO ORIGINAL

Den e articulo cu Noticiacla a reproduci, Vroegop ta menciona e.o. cu e tin problema p.e. cu e hecho cu mediconan Hulandes no por re educa otro coleganan y trece nan riba mesun nivel debi na e AruBig. Algo cu Oduber a contradeci un dia despues. Tambe Vroegop a bisa den e mesun articulo cu e hospital por haya problema debi na e aspecto di seguro y protocol. Asina tin varios cos pa cual e director ta preocupa cu e introduccion aki. Sinembargo despues di a tuma nota di e reaccion di minister un dia despues y cu ta mustra cu e declaracion lo a wordo malinterpreta, e director a usa un tono poco diferente.  

RELACION HOSPITAL Y GOBIERNO

“E relacion entre hospital, directiva y e minister ta hopi bon segun nos. Nos ta lamenta cu esaki a keda interpreta diferente aya fo. Ta bon cu nos sa miho, y hunto cu gobierno di Aruba lo sigui traha na un cuido factible, acesible y di calidad halto di parti di profesionalnan pa esnan cu mester di esaki riba e isla”, e director ta sigui bisa. 

SISTEMA DI CALIDAD

Segun Vroegop, un sistema di calidad manera e registracion Hulandes Big, pero tambe e registracion Canades y Mericano, ta pa por garantisa e calidad di cuido di salud, provee continuidad y percura  pa pashentnan ricibi un tratamento uniforma mundialmente conoci como ‘evidence based’, y no pa provee empleo pa dokternan”. 

YIUNAN DI TERA

Segun e director medico, HOH ta reconoce cu ta importante pa ofrece yiunan di tera cu a studia den e regio un lugar dentro di cuido medico.  Cu e ehempelnan cu e ta duna, hopi por interpreta cu e kier mustra di otro banda cu no necesariamente mester di AruBig pa logra cu yiunan di tera por haya trabou medico. “HOH a inverti caba hopi aña pa yiunan di tera cu a studia otro caminda, haya e registracion aki” Vroegop ta sigura e portal aki. Segun e director, e comision di enseñansa di HOH bou di guia di dr Deepu Daryanani, dr. Louise Rafael Croes, dr. Sandro Waterloo, dr. Alex Ponson y dr. Sietske Althuisius a formula un programa cu ayudo di VU (Universidad di Hulanda), pa duna e yiunan di tera aki e chens pa haya e registracion aki. Cu e registracion aki, un docter no solamente por traha na Aruba pero tambe riba otro islanan (di region) y Europa, y ta brinda tambe pa e persona individual, mas posibilidad pa futuro.  

DOKTERNAN HULANDES

“Pami y HOH e enfoke no ta riba dokternan Hulandes. Esey no ta primordial pa nos, sigur no den un mundo cu ta cambia y un isla internacional manera Aruba. Nos kier dokternan cu di un manera oficial ta cumpli cu un sistema di calidad”. Y aki e ta bin bek dunando elogio riba e introduccion di AruBig. “Pesey e instituto AruBig ta tambe un paso den bon direccion pa canalisa e calidad di mediconan. HOH ta para prome pa un bon cuido medico pa tur pashent. “HOH na fin di dia kier mas yiu di tera. Esaki debi na e idioma, cultura etc. Pero tambe pasobra mayoria bes nan ta keda (Aruba) compara cu un parti grandi di dokternan Hulandes” e director ta finalisa bisando.