Minister na Vroegop: HOH mes ta kere den AruBig

ORANJESTAD – Traha segun norma di calidad, protocol y otro reglanan ta wordo introduci net awor door di AruBig. Cos cu antes no lo tabata asina. Asina minister di Salud Dangui Oduber ta bisa den un continuacion di comentario riba hospital su reacccion na director di Horacio Oduber Hospital (HOH) pa cu implementacion di AruBig. HOH a critica e introduccion di AruBig den un articulo cu e portal aki a reproduce di Caribisch Netwerk y e mandatario a reacciona contra dje. E portal ta sigui den parti dos di e reaccion aki awe, debi na su largura. 

PROTECCION

E ley aki (AruBig) segun Oduber, tin como meta principal, pa proteha e pashent door di permiti solamente cuidadornan di salud reconoci pa duna e cuido aki. HOH segun Oduber, ta ignora e hecho cu tur e añanan aki caba tin profesionalnan medico den region ta traha aki sin un BIG registratie y cu e demanda na cuido medico ta birando mas grandi. Ademas, ta birando mas y mas dificil pa atrea cuidadonan di salud for di Hulanda. Si ta traha solamente riba cuido basa riba registracion BIG, lo tin un scarsedad grandi, segun Oduber, y esey ta nifica cu e necesidad pa cuido lo ta mas grandi y insostenibel.  Esey segun Oduber, HOH tambe a realisa sino nan lo no a bay orienta na Bucaramanga Colombia, manera cu e director mes a bisa e minister recientemente. Esaki ta indica netamente cu nan ta kere den Arubig, segun Oduber. Pashentnan ta wordo trata na Colombia y HOH ta buscando mas cooperacion cu Colombia, loke ta netamente loke cu AruBig ta sostene, e mandatario ta sigui bisa den su reaccion na noticiacla.

IMSAN

Hasta IMSAN, e mandatario ta sigui bisa, cu ta sigui un calidad mas dirigi riba e forma Mericano, tambe ta un ehempel. E resultado di nan cuido y e aceptacion di esaki den e comunidad ta sumamente bon. Un bon cuido medico pagabel ta loke pais Aruba ta boga pe. Bon cuido pa tur ciudadano. AruBIG ta bringa netamente e espacio pa tur instancia di cuido pa tin personal medico di bon calidad den servicio. E aspecto huridico y e cuestion di seguronan, responsabiulidad y protocol, tur ta asuntonan interno y ta cay bou di otro ley, manera Landsverordening kwaliteit in de gezondheidszorg, y no bou di AruBig, e mandatarioa sigui bisa. Y finalmente, ta solamente esnan cu ta cumpli cu e normanan minimo, por registra den e registro di AruBig. No tur universidad di Colombia y Costa Rica ta wordo reconoci, pues ta apenas 5 ta reconoci. Tur otro ta bay pa e enseñansa Mericano y Canades. Eseynan ta cumpli cu e calidad manera Hulanda. Y tur esaki segun Oduber, a wordo haci den interes di e pashent y e comunidad. “Na fin di dia, esaki ta beneficia e cuido medico y e profesionalnan mes. Den cuadro di AruBig cu ta conta pa Aruba completo, HOH por sigui trankil cu nan forma di haci negohi.