Politico Benny Sevinger a bandona KIA diamars atardi

SANTO PATIA – Den careda di 3’or y mei diamars atardi, Benny Sevinger a bandona KIA despues di tabata encarcela pa algo mas cu 2 luna. Na salida, el a topa cu un grupo basta grandi di familiarnan y simpatisante y miembronan di partido AVP, y unda cu el a papia cu prensa presente, unda cu sr Sevinger a mustra cu ta bay bringa duro pa sali for di loke e ta aden, y cu e no ta bay ta facil, pero e ta cla pa bringa pa su libertad. E ta sigui bisa tambe cu ‘el que nada  debe, nada teme’, cu ta un declaracion cu el a bisa for di comienso. Riba su huramentacion como parlamentario, el a bisa cu el a papia cu su abogadonan cu a manda un carta caba cu gobernador, y eynan ta haya sa ki dia e ta bay huramenta como parlamentario. Esaki pasobra dia 25 di juni ultimo, sr Sevinger a logra suficiente voto pa saca su mes y asina haya un di e asientonan di partido AVP. E la bisa cu e no ta bay keda keto y ta bay papia tur cos di su experiencia, conforme si loke cu e por bisa, pasobra e la wordo restringi pa huez comisario pa loke e por haci y bisa. Potret ta screenshots cortesia di Telearuba.