Oduber ta contesta HOH: Arubig no ta stroba HOH di funciona

ORANJESTAD – Ta di lamenta e forma con AruBig a keda presenta den prensa. Asina minister encarga cu salud Dangui Oduber a reacciona riba e articulo di Noticiacla (reproduci for di Caribisch Netwerk) diamars atardi. Ta trata di e declaracion di e director di hospital Jaco Vroegop cu a bisa cu Horacio Oduber Hospital (HOH) ta prefera e BIG registracion di Hulanda riba esun di AruBig. Den un reaccion basta extenso, e mandatario ta bisa e.o. cu ningun forma AruBig ta stroba e hospital di haci su trabou y su escogencia medico. Mas pio ainda, AruBig segun Oduber, no ta obliga HOH pa tuma docternan di region den servicio. “Si HOH kier keda enfoca riba e calidad di nivel medico di Hulanda, ta nan pleno derecho” e mandatario ta sigui bisa. “Bisa cu comosifuera AruBig ta stroba HOH di funciona bon, ta un presentacion totalmente robez di asuntonan cu no ta cuadra cu realidad y cu ta mas bien bruha tera cerca tanto personal di hospital como publico”

LEY

E mandatario ta sigui bisa cu AruBig ta un ley stringente. Y hasta e exigencia pa e estudio cu ta den ley, ta proteha e nivel, e expertisio y e capacidad di e dunadornan di cuido.  “E insinuacion cu BIG su mediconan registra ta superior di calidad, ta algo hopi malo y ta carece di berdad”.  E punto di bista aparente di e director di cu e introduccion di AruBig, dokternan Hulandes no ta permiti mas pa educa nan mes mas, no ta di e tempo aki segun e mandatario. De hecho, e mandatario ta sigui bisa, e reeducacion tin cu sosode door di educadornan reconoci, y no door di coleganan selectivo.  “Ta netamente e introduccion di AruBig ta percura pa e calidad y e mantenimento di conocemento door di cuidadonan di salud no registra door di BIG. Cu otro palabra, AruBig ta net un extra control pa calidad”, e mandatario ta finalisa bisando entre otro. E relato ta continua mayan.