Benny Sevinger ta haya su libertad condicional awe

ORANJESTAD – Despues di algo mas di 2 luna deteni, di cual gran parti tabata na KIA, awe tardi 4’or, Benny Sevinger ta recobra su libertad condicional for di KIA. Su abogado David Kock a confirma esaki pa noticiacla despues cu huez comisario a trata e peticion awe tardi 2’or. Segun mr Kock, e condicionan pa cu su libertad ta esnan normal, manera e.o. cu no mag di comete otro delito, no mas di tin contact cu otro sospechoso y tin cu aparece si fiscal of juez manda yame. 

E CASO AWE

Manera cu e portal aki a raporta dialuna, awe pa 2’or huez comisario lo a trata e caso di suspension di detencion di sospechoso Benny  Sevinger den caso Avestruz. Sevinger pa medio di su abogado mr David Kock a entama e caso ey. Y si abogado mr  Kock logra convence  e huez comisario, tabata nifica cu Sevinger lo por a haya su libertad temporal posiblemente awe mes. Y esey tambe a sosode. Unabez cu esey sosode, no ta descarta cu e lo por huramenta como e di 21 parlamentario pa pais Aruba.   

DETENI

Manera ta conoci, dia 26 di mei ultimo (2 luna pasa) sr Sevinger a wordo deteni como sospechoso principal di e caso Avestruz cu ta trata e.o. corupcion, falsificacion di firma y pertenece na un organisacion criminal. Despues a prolonga su detencion cu 16 dia dia 4 di juni ultimo. Y dia 20 di juni ultimo (un siman prome cu eleccion) a prolonga e detencion cu 60 dia, cu ta termina dia 20 di augustus proximo, esta 3 siman y mei. “A menos cu tin un gewijzigde omstandigheid cu ta hustifica un peticion di schorsing” e detencion di Sevinger lo keda vigente, abogado David Kock a finalisa bisando. Cualkier otro version, no ta cuadra. Esta cu a duna ordo pa tene cera te ora cu e caso bin dilanti. Siman pasa Gobierno mientrastanto a informa cu e version cu gobierno a duna OM ordo pa tene Sevinger deteni  te ora cu e caso bin dilanti ta politicamente motiva, y pues ta ‘fake news’, y cu esaki no ta berdad. Esta cu ningun momento a duna Ministerio Publico ordo pa tene Sevinger cera.