HOH ta prefera sistema Hulandes riba esun di AruBig

ORANJESTAD – Hospital Horacio Oduber no ta mucho positivo cu AruBig ta den funcion for di ayera. Asina e director di e hospital Jacco Vroegop ta declara na Caribisch Netwerk. AruBig ta pone cu e.o. mediconan, boticario, dentista y otro personal metido tin cu registra nan mes den e registro medico nobo.  Segun e articulo di CN, Vroegop:” Nos ta preocupa”. E ta splica cu tres cuart di e personal ta educa segun e sistema Hulandes y e resto no. E ultimo grupo aki ta sigui normal cu e sistema Hulandes y e ta bayendo bon segun Vroegop. “Pero si e balans ey no tey mas, e ora lo bira mas fastioso pa mediconan Hulandes pa re educa otro coleganan y trece nan riba e mesun nivel”. 

 Pakico AruBig

Traha segun e sistema Hulandes BIG (Wet op de beroepen in de Individuele Gezondheidszorg) ta nifica cu tin cierto norma di calidad, protocol y otro regla pa asina por proteha e pashent contra tratamento incompetente y descuida.   Aruba a bin cu su propio AruBig pa resolve e escases den empleo medico. Pero tambe pa duna hobenan cu ta studia medicina den region (envez di Hulanda) un chens pa por traha den cuido medico na Aruba. Eskai no por awor debi cu e regla y norma di calidad di e sistema Hulandes hopi biaha no ta possible, sin reeduca nan mes na Hulanda of cursonan reconoci. 

Segun Vroegop, e hospital kier sigui cu e sistema Hulandes BIG pasobra e e sistema hudirico di hospital ta traha asina. “Pues tambe nos Seguro, y tambe e Seguro di responsabilidad, nos protocolnan, nos guianan. Si bo bandona esey, e ora bo ta traha full un otro hospital. Esey por, pero esey bo no ta haci di un dia pa otro. Y esey ta trece basta problema cune”. 

 Kico e ta nifica pa pashent?

Riba e pregunta di si pashentnan lo ripara algo di e cambio pa AruBig, e director ta bisa lo siguiente: “ E sistema Hulandes ta uno proba eficiente den tuma e decision corecto den tratamento y e gastonan cu ta acopla na esaki”. Pa sistemanan di otro pais esaki ta otro, segun e director, y esey tin sigur consecuencia pa e calidad di cuido. “Colombia por ehempel, ey e cuido den hospital ta hopi bon. Pero ey ta traha hopi experimental. Y na Colombia esey ta financiabel, pero no na Aruba”. 

E registro di Aruba

Gobierno di Aruba a yama tur personal cu ta cay bou di AruBig, pa registra nan mes. Esey por te dia 15 di November proximo, y despues departamento di salud ta bay cuminsa controla. 

Texto Caribisch Netwerk.