Wardacosta ta yuda barco di bela ‘Skagen Primero’

ORANJESTAD - Diasabra anochi e barco di bela ‘Skagen Primero’ cu tawata nabegando di Panama pa Trinidad & Tobago cu dos persona na bordo a yega Aruba pa refuel pa nan por sigui nan ruta. Pa motibo di biento duru riba ruta nan mester a nabega riba nan motor cual a pone cu nan fuel a baha hopi abou. Pesey e personanan a tuma contacto ku Aruba pa por refuel nan barco pa nan por sigui pa Trinidad y Tobago.

Na momento cu nan a yega Aruba nan a haya permiso di Aruba Port Authority pa por ancra na Nikki Beach bou di guia di Wardacosta pa warda eynan pa haya fuel. Den oranan di ayera mainta Wardacosta a haya notificacion cu e barco di bela lo a los for di anker y bai pega riba rif di oost na entrada di Paardenbaai. Na yegada di e patruya di Wardacosta mester a bringa bastante pa por a logra los nan for di riba rif. Despues di a logra kita nan, Wardacosta a guia ‘Skagen Primero’ pa Barcadera pa nan haci ‘inklaring’ serka Aduana. Despues e personanan por a refuel pa por a sigui nan ruta pa Trinidad y Tobago.