Director financiero di WEB awe a acepta pakete di retiro tambe

ORANJESTAD – Director financiero di WEB Aruba NV Randolph Ruiz tambe a yega na un areglo cu e compania  y ta bandona e compania. Asina su abogado David Kock a confirma dialuna mainta pa noticiacla. Segun e abogado, e ultimo dia di trabou oficialmente pa e cliente tabata ayera 1 di augustus. Pero e areglo a yega na dje awe mainta durante e reunion cu Utilities. Detayes di e acuerdo no ta conoci si pero ta trata si di un asina yama ‘golden handshake. 

DEN FIN DI SIMAN

Manera cu e portal aki a raporta den fin di siman, contrario cu e director di WEB Aruba NV Luis Oduber, Utilities NV,- compania doño di WEB-, no a yega na acuerdo ainda pa un pakete di retiro cu e director financiero Randolph Ruiz. Asina su abogado mr David Kock a confirma pa noticiacla diasabra. Segun mr Kock ‘Semper (nan) por dicidi di approach nos cu un miho oferta”. Nan tabata negoshando varios dia pero ainda no a haya otro riba termino cu e cliente di mr Kock por acepta. Sr Oduber a logra su pakete diabierna pa cual  diasabra tabata su ultimo dia di trabou oficial. Sr Ruiz tabatin cu negosha un poco mas pa logra esaki. Mescos cu sr Oduber, Sr Ruiz tambe tabata riba e lista di persona pa wordo ‘retira’ debi cu no tin mas confiansa den su persona pa motibonan ainda ‘desconoci’. Tabata siman pasa cu e director di Utilities Richard Eman a confirma durante un conferencia di prensa cu e tin problema cu e dos personanan menciona, pa cual ta practicamente sigur cu lo a sigui retiro di nan dos.