DVG: Casonan di Covid19 na Aruba ta sigui aumenta drasticamente!

ORANJESTAD- E cantidad di casonan di Covid19 na Aruba ta sigui aumenta drasticamente, manera cu Directie Volks Gezondheid (DVG) mes a bisa diasabra mainta.  Segun resumen di awe un total di 79 caso nobo di COVID-19 a keda registra cual 13 ta turista y 66 ta residente. E cifranan aki ta representa un 'Positivity rate' bou di nos residentenan di 32%. Cantidad di casonan activo di COVID-19 pa awe ta 460 y cantidad di fayecidonan relaciona cu COVID-19 ta 110.

Datos ta indica un subida continuo di casonan nobo cu un average semanal di 54 caso pa dia y un average di 'positivity rate' semanal di 25% pa dia. No a duna informacion di cuanto di e casonan positivo nobo ta hendenan cu ta vacuna y no, y tampoco esnan hospitalisa. 

HOSPITAL

Hospital tin 10 persona interna di cual 3 ta den ICU, 2 ta den ICU como caso activo y 1 ta den ICU como caso inactivo y riba piso general tin 7 persona interna di cual 6 ta caso activo y 1 inactivo.