Director di WEB Luis Oduber a acepta pakete di retiro

ORANJESTAD – Awe diasabra ta ultimo dia di trabou di ing Luis Oduber como director di Web Aruba NV. Asina su abogado mr Chris Lejuez a confirm diasabra na noticiacla.com. Segun e abogado, diabierna (ayera) su cliente a yega na acuerdo cu Utilities NV pa un pakete di retiro cu sr Oduber a dicidi di acepta. Cu esaki tambe, sr Lejuez a confirma cu awe ta e ultimo dia di trabou como director di su cliente. Esey kier men tambe cu e no ta necesario mas pa presente na e reunion di dialuna proximo, unda cu Utilities a keda di ‘atende’ e situacion delicado di ‘posibel retiro’ di sr Oduber. Segun sr Lejuez ta varios dia caba tabata negoshando y diabierna partidonan a haya otro y cu sr Oduber a acepta e deal. E abogado no por a divulga detayes ya cu esaki ta informacion ‘confidencial’. Pero por compronde cu ta trata di un ‘golden handshake’,cu ta nifica cu sr Oduber ta bandona WEB cu un suma di placa cuantioso, conforme palabra den e negosacion cu a termina diabierna. A compronde cu sr Oduber tabata gana 22 mil florin pa luna y cu su 15 anja di servicio, por spera un suma basta grandi cu e ta bandona WEB cu ne.  Den combersacion cu e director di Utilities sr Richard Eman, e no por a bisa noticiacla mucho cos awe mainta y a pidi pa warda te despues di e reunion di dialuna mainta. 

PROBLEMA

For di siman pasa a compronde ‘oficialmente’ cu tin problema cu e director y su director financiero sr Randolph Ruiz, ora cu e director di Utilities NV Richard Eman a confirma esaki durante un conferencia di prensa diaranson despues di a reuni cu formador Evelyn Wever Croes riba e formacion di gobierno. Eynan sr Eman a confirma cu tin problema cu e directornan y cu posiblemente esaki lo conduci den nan respectivo retiro. E reunion pa determina esaki lo mester tuma lugar dia 2 di augustus awor, pero esaki ta sigui solamente cu e director financiero awor Randolph Ruiz (otro articulo) cu cual ainda no a logra un aregla di despedida.