“Magic Plane” di Westjet a bishita Aruba

ORANJESTAD – E tabata un bahada di avion hopi special pa 3 mucha di scol cu a gana e oportunidad pa mira e avion di Westjet yama “Magic Plane” di serca. WestJet ta 1 di e 3 aerolineanan for di Canada cu ta duna servicio riba e ruta Toronto – Aruba 2 biaha pa siman. Westjet a ateriza pa prome biaha na Aruba dia 2 di November 2, 2008 como un aerolinea charter y a cuminsa cu servicio regular dia 6 di Mei, 2012. E ekipo di Aeropuerto di Aruba a pensa cu e lo ta un oportunidad unico pa brinda 3 mucha di scol e oportunidad pa por presencia e yegada di e avion special aki riba rampa y pa e muchanan por wak e avion di serca. E avion special aki su nomber ta “Magic Plane” y el a wordo specialmente diseña pa conta un storia di su rabo te su nanishi. E ta cuminsa cu Mickey, prominente riba e rabo di e avion, cu e streanan magico saliendo for di su mannan. E streanan magico ta pasa riba e halanan, culminando cu vuurwerk riba e kasteel di Cinderella na Walt Disney World. E potretnan ta ilustra e felis ganadornan Evander Nedd, Justin Valdez y Denzel Valdez hunto cu Mickey y Mini cu tabata contento pa mira e “Magic Plane” di serca. Corda pa sigui “Like” y bishita Aeropuerto su facebook page “Aruba Airport” pa gana oportunidadnan unico.