Delegacion di prensa di Aruba a reuni cu Formador

ORANJESTAD – Diahuebs atardi un delegacion di tres periodista cu a haya mandato di un grupo basta grandi di periodista di Aruba, a reuni cu Formador Evelyn Wever Croes. E intencion tabata pa mescos cu otro stakeholders, Formador tende kico ta e inquietud, e situacion actual entre prensa y gobierno, con e relacion por ta un tiki mas miho den futuro, y kico ta spera di e relacion entre prensa di Aruba y e gabinete Wever Croes II. En general e tabata un reunion unda cu tanto e delegacion di prensa como Formador y su delegacion a intercambia di pensamento. A resulta cu esaki tabata e prome encuentro ‘formal’ entre prensa y gobierno den hopi tempo.

E ENCUENTRO

Tabata periodistanan Ariën Rasmijn (Amigoe), Tito Laclé(Noticiacla) y Sharina Henriquez (CN) cu a haya mandato di e grupo di prensa pa representa nan den e reunion di diahuebs atardi. Entre e puntonan treci dilanti, tabata e transparencia di gobierno pa cu e informacion cu mester bin dilanti, y con miho por sirbi door di ta mas transparente. Esaki den aspecto cu no ta solamente loke gobierno ta kere ta importante pa trece dilanti (selectivo), pero pa trece e informacion completo. Tambe a trata e aspecto di prensa selectivo, unda cu tin e pensamento cu gobierno ta selecta cierto prensa riba otro, y no ta comparti informacion cu tur. Un punto interesante tabata e evaluacion di e ultimo aña di pandemia y kico ta e problemanan cu prensa a haya nan mesa aden debi na e actitud inicial di prensa. Gobierno a informa cu esaki tabata un ‘eyeopener’ pa nan, ya cu varios aspecto nan no tabata na altura di dje, of tabatin un percepcion robez di e trabou di prensa. Interesante tabata e aspecto pa determina con grandi e grupo di prensa na Aruba ta y ken tur ta laborando oficialmente como periodista y ken no. Di banda di Formador, a sugeri pa continua cu e tipo di reunionan cu prensa pa asina crea un miho ambiente den futuro.