Asosacion di empleadonan di WEB ta condena campaña contra su directornan

ORANJESTAD – E asosacion di empleadonan cu tin contract individual di WEB NV ‘(VWI) ta condena categoricamente e campan?a publico sushi y baho  contra di e dos directornan y contra WEB en general’. Asina nan ta bisa den un comunicado cu nan a publica diahuebs mainta. Ta trata di un asosacion di empleadonan cu un contracto individual di WEB Aruba NV. No ta conoci con grandi e asosacion aki ta pero nan ta sigura cu nan ta representa 75% di e staff di WEB. E reaccion di e asosacion aki ta basa riba declaracionan haci pa e director di Utilities Aruba NV, ing Richard Eman diaranson atardi despues di su encuentro cu formador.  

CONCLUSION

E asosacion aki, (VWI) ta cuminsa na bisa di a tuma nota di un cantidad di acusacionnan contra e dos directornan di WEB cu a sali publica den e matutino Diario y tambe den Solo di Pueblo. E asosacion ta bisa tambe cu ora prensa a puntra Sr. Eman kico ta e motibonan pa ta considerando pa kita e directornan di WEB for di trabou, Sr. Eman no kier a bay den detayes, ta pasobra e berdad ta cu Sr. Eman no por bay den detayes pasobra, te cu VWI ta na haltura, no tin motibonan real pa kita e directornan for di trabou. 

TRANCA NEGOSACION PA GAS

E asosacion ta sigui relata riba e parti cu e directornan di WEB lo ta tranca e proceso di negociacion cu e empresa proveedor di gas natural liquido (LNG), esta EAGLE LNG. E acusacion aki tampoco ta cuadra cu e realidad segun e asosacion. “VWI ta representa mas cu 75 porciento di e staff di WEB y nos miembronan ta cerca y conoci cu kico ta e berdad di loke ta pasando cu e asunto di LNG y cu e asunto di RECIP” nan ta sigui bisa. “ E declaracion di Sr. Eman, bisando den e rueda di prensa, cu ta WEB mes a para su proceso pa adkiri LNG tampoco ta cuadra cu berdad. E acusacionnan vil y baho den medianan di prensa contra e dos directornan di WEB no solamente ta atacha e bon reputacion di e directornan, pero tambe ta atacha e reputacion di tur nos miembronan y trahadonan general di WEB” e asosacion ta sigui bisa. “No ta keda VWI nada otro di conclui cu aki tin forsanan siniestro ehecutando un agenda personal of politico cual ta encera e terminacion di e dos directornan pa por realisa nan propio agenda. VWI lo sigui monitor e desaroyonan aki di cerca y si ta necesario nos lo responde den e forma adecuado” e asosacion ta termina bisando.