Director di Utilities ta confirma cu directornan di WEB lo por haya retiro

ORANJESTAD – E dianan di directornan di WEB Aruba NV esta e director general Luis Oduber y e CFO (Chief Financial Officer) Randolph Ruiz ta conta. CEO di Utilities Aruba NV Richard Eman a confirma diaranson atardi durante un conferencia di prensa cu ‘no tin hopi confiansa den nan’, y cu e proximo reunion cu nan ‘por resulta den retiro’. Mas cu esey sr Eman no kier a duna pero si a usa e termino ‘awa a pasa hariña’. E reunion den cual mester a atende e asunto delicado aki tabata programa inicialmente pa dia 22 di July ultimo, pero a pospone esaki riba peticion di e dos directornan. Loke a hala atencion di sr Eman tabata e hecho cu ambos director a opta pa bay cu vacacion. Lo duna nan un tempo pa reuni eynan y esaki ta dia 2 di augustus proximo. Sr Eman no ta descarta cu durante e reunion ey lo duna e dos directornan nan respectivo retiro e momento ey. E motibo di e falta di confiansa pues, no ta conoci y sr Eman no kier a bay den detayes. 

TRAYECTORIA

E trayectoria pa ambos persona no ta desconoci. Luis Oduber (55)  a cuminsa traha na WEB Aruba N.V. desde aña 2001 y su funcion tabata 'Sector Manager Onderhoud'. Cu un bon conocemento den tur aspecto tecnico y di mantenemento, e accionista di WEB Aruba N.V., esta Utilities Aruba N.V., tabata totalmente convenci, cu e lo a por sigui guia e compania na e siguiente nivel di crecemento, desaroyo y di innovacion. Asina a participa na comunidad na 2016 ora cu a dicidi cu Oduber mes lo a keda como director entrante 1 di januari 2016 despues di a fungi algun tempo como director interino ora cu e director anterior a wordo manda cas. Randolph Anthony Ruiz a keda oficialmente nombra como “Chief Financial Officer” (CFO) di WEB Aruba N.V. dia prome di october 2016. El a obtene su “Masters” den Accounting na aña 1996 na St. Thomas University na Miami. E tin amplio experiencia den mundo financiero y a traha den diferente sector, entre otro como “Senior Audit Manager” na Ernst & Young Aruba y “Financial Director” na Tierra Del Sol.