Parlamento a aproba retiro di Juan David Yrausquin

ORANJESTAD - E retiro di minister di Finanza Juan David Yrausquin a wordo aproba den Parlamento di Aruba diabierna merdia. E parlamentarionan a trata esaki den comision central, y cu un mayoria esaki a pasa. Presidente di parlamento Chris Dammers a confirma na NoticiaCla cu awor e proceso ta pa e documentonan respectivo di retiro di sr Yrausquin, pasa pa gobernador di Aruba. "Na su debido tempo, ora cu gobernador firma esaki, su retiro ta bira oficial" Dammers a sigura NoticiaCla. Mientrastanto e mandatario ta keda demisionario. No ta conoci ki dia gobernador lo haci esaki. 

Tabata exactamente 2 siman pasa cu Yrausquin a entrega su retiro na gobernador den un forma sorpresivo. Motibo principal di su retiro tabata "e abuso increibel di poder cu a wordo eherci riba e Gobierno di Aruba den e ultimo simannan pa e Gobierno Hulandes y cual abuso di poder lamentablemente a wordo sosteni pa Gobernador". Den su carta di retiro dirigi na Gobernador, Juan David Yrausquin a subraya cu e abuso di poder aki a causa y ainda ta causando daño serio na e credibilidad y finanzas publico di nos Pais pa cual e no por sigui carga responsabilidad.Mirando cu segun nos Constitucion ta e mandatario ta esun cu ta carga e responsabilidad ministerial pa e actonan di Gobernador, y den esaki ta trata actonan di Gobernador cu ta cay bou di su responsabilidad ministerial, cual ta finansas publico, Juan David Yrausquin, como Minister di Finansas a saca su propio conclusion y ta asumi responsabilidad politico pa e abuso di poder cometi pa Gobernador.