PG a bisa cu dia tin metemento di politica den OM, e lo retira

ORANJESTAD – Dia cu tin metemento politico den Ministerio Publico, e procurador general Bote ter Stege lo retira. Esey tabata su comentario diaranson mainta durante un conferencia di prensa despues di su bishita na formador. Ter Stege tabata e prome bishita di formador den cuadro di formacion di gobierno. E tema di metemento politico a bin dilanti durante e conferencia di prensa unda cu ter Stege a desmenti categoricamente cu gobierno ta mete cu Ministerio Publico (OM) y cu tin un relacion estrecho entre PG y formador. “Absurdo” e PG a bisa. Ademas e ta sigura tambe cu OM ta traha riba su propio tempo y no tin presion di ningun hende pa sea termina of pura un investigacion di tuma lugar. “Nos ta traha riba e tempo cu ta necesario pa nos, y niun otro hende ta determina e tempo pa nos”, ter Stege a sigui bisa. 

INTERES

Interes di prensa tabata halto pa e conferencia aki mirando e situacion huridico actual rond di varios caso di interes  manera detencion di e sospechoso Benny Sevinger den caso Avestruz. E PG no a haci referencia personal riba e caso aki, pero a sigura cu no tin ningun metemento di politica den OM y cu statuut ta regla esaki hopi bon tambe. Ademas no ta asina cu tin hende cu ta poniendo presion riba nan pa pura e caso of para esaki. :That is beyond the truth” ter Stege a sigura prensa diaranson mainta. 

INSINUACION

E ultimo simanan tabatin hopi insinuacion y raportahe riba possible metemento di politica den ministerio publico, unda cu un banda tabata referi specificamente den e caso di Benny Sevinger y caso Avestruz, pa loke ta su detencion prolonga y of envolvimento y e interes di OM pa no atende cu e caso manera cu mester ta of cu e independencia necesario. Y den forma general, PG ter Stege a sigura, manera por a spera, cu no tin ningun metemento di politica den e aparato hudicial, y ni tampoco pa cu influencia di hueznan y cu hueznan tambe ta independiente den nan funcion. “Ta ked ana huez pa determina si un persona ta culpable of no di un caso” ter Stege a sigui bisa.