ORANJESTAD – Dia cu e 60 dianan di detencion preventivo di sospechoso principal di caso Avestruz Benny Sevinger vence, of poco prome, huez comisario lo ‘toets’ e situacion atrobe pa wak si ta laga sr Sevinger den libertad atrobe. Asina abogado David Kock a confirma pa e portal aki. Tin varios version ta circula riba detencion di Sevinger, for di cu ‘a haya ordo pa tene cera’, te na ‘lo cere te ora cu su caso bin dilanti’ pero ningun di e dos versionan ta cuadra segun e abogado. Segun Kock, su cliente ta simplemente cumpliendo cu su termino di detencion preventivo.
DETENI
Manera ta conoci, dia 26 di mei ultimo (2 luna pasa ayera) sr Sevinger a wordo deteni como sospechoso principal di e caso Avestruz cu ta trata e.o. corupcion, falsificacion di firma y pertenece na un organisacion criminal. Despues a prolonga su detencion cu 16 dia dia 4 di juni ultimo. Y dia 20 di juni ultimo (un siman prome cu eleccion) a prolonga e detencion cu 60 dia, cu ta termina dia 20 di augustus proximo, esta 3 siman y mei. “A menos cu tin un gewijzigde omstandigheid cu ta hustifica un peticion di schorsing” e detencion di Sevinger lo keda vigente, abogado David Kock a finalisa bisando. Cualkier otro version, no ta cuadra. Esta cu a duna ordo pa tene cera te ora cu e caso bin dilanti. Gobierno mientrastanto diamars atardi a informa cu e version cu ta politicamente motiva, ta ‘fake news’, y cu esaki no ta berdad. Esta cu ningun momento a duna Ministerio Publico ordo pa tene Sevinger cera
ORANJESTAD – E persona doño inicial di e cacho Blacky cu a haya e nomber despues di Khaleesi, mester presenta dilanti huez dia 22 di mei proximo. Asina corte a informa diahuebs ultimo. Ta trata di e ciudadano Alberto Groeneveld. Ora cu e caso a bira conoci, esaki a haya masha hopi reaccion di comunidad, cu a desemboca finalmente den un caminata di protesta contra maltrato di bestia. Groeneveldt ta wordo acusa di, den e periodo di prome di januari 2024 te 26 di maart 2024, varios biaha y sin ningun meta y surpasando tur loke ta permiti, a intencionalmente haci un bestia (un cacho di nomber Khaleesi) dolor y/of causa e cacho herida y/of a perhudica salud di e cacho, dor di laga e cacho pa tempo largo mara na un cadena demasiado cortico y inadecua y/of a keda sin duna e cacho e cuido necesario, dor di keda sin duna e cacho cuminda y/of awa pa e bebe y/of cuido pa su heridanan y/of remedi.
ORANJESTAD – E asosacion di radio na Aruba (Aruba Broadcasting Association-ABA) y e fundacion DUCAPRO (registro di derecho di artista y musica) no a haya otro ainda riba e suma cu radionan tin cu paga pa por tin derecho pa toca cierto musica na nan radio. Por lo menos, den forma inoficial ya cu ningun di dos partido ‘oficialmente’ a duna un reaccion. Conforme un caso sumario un luna pasa, huez a ‘suspende’ e caso y a duna partidonan te cu 24 di April (ayera) pa yega na otro riba e suma. Di otro forma, lo mester continua cu e caso y eventualmente dicta un sentencia, cu ta traduci na un suma stipula pa corte cu radionan mester bay paga DUCAPRO pa toca cierto cancionan na nan respectivo emisora.
ORANJESTAD – E testigo principal di parti defensa den caso Flamingo, den e caso aki, e hefe di BCI, lo no por declara dilanti Huez Comisario. Asina ex minister Otmar Oduber a declara publicamente diamars. Segun e ex mandatario, Huez Comisario a informa nan diabierna ultimo cu e motibo ta cu salud di e testigono ta permiti.
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.