Stadion Guillermo Prospero Trinidad lo conoce renobacion miyonario

ORANJESTAD – Gobierno (lesa: minister Dangui Oduber) a anuncia diamars cu lo ‘porfin’ lo renoba stadion Guillermo Prospero Trinidad. Esaki a sosode den presencia di presidente nobo di Aruba Voetbal Bond AVB Randolf Laclé. Y esaki lo no conta cu fondonan di Lotto, sino segun Oduber, a logra bira creativo y a cera e fondo pa via presupuesto di gobierno, financia esaki. E suma presupuesta ta 1.5 miyon florin pa e prome fase. E trabou lo tuma lugar den fase, unda cu e prome parti lo ta pa pone yerba artificial (artificial turf) nobo, lo renoba e “kleedkamer” nan y lo renoba e parti tribunal. Den e di dos fase lo bay bay cambia e iluminacionnan di e veld y renoba e “atletiek band”. E proceso di destaho publico ta engarga pa e departamento di DOW y lo start pronto, asina e minister a declara.

FIFA

Minister Oduber a recorda pueblo riba e hecho cu ya pa varios aña caba e stadion di Guillermo Prospero Trinidad mescos cu otro facilidadnan no a conoce un renobacion y consecuentemente a conoce un deterioro. Un di e consecuencianan ta cu Aruba su seleccion nacional no por hunga weganan international na cas como cu e stadion a wordo desaproba pa FIFA.

PROME WEGA INTERNACIONAL

Presidente di AVB a declara cu si tur cos cana segun plan ya pa maart di aña 2022 lo por tuma lugar e prome wega internacional riba e veld. E renobacion aki mester a tuma lugar pa Aruba por cumpli cu e rekisitonan poni pa FIFA. Cumpliendo cu esakinan ta haci cu AVB lo por ricibi fondonan adicional for di FIFA, asina e mandatario a duna di conoce.