Casi 200 studiante di Corsou a bay Hulanda pa inicia estudio avansa

WILLEMSTAD - Dos grupo di studiante di kua e promé a sali mèrdia tempran i e di dos grupo mas anochi, ta rumbo pa Hulanda pa sigui nan estudio avansá. Ta trata di dos grupo, unu di 94 i e otro di 96 hoben ku a yega e total di 190 ku awor aki ya ta na Hulanda. E aña aki nos por papia un biaha mas di e kustumber di hopi aña, kaminda e grupo  di hóbennan ku kaba nan estudio sekundario pa bai pa mas avansá, a sali pa Hulanda.

Aña pasa debí na e pandemia di COVID-19, hopi hóben no a sali pa Hulanda ni otro parti di mundu pa sigui studia. Vários a sigui oportunidatnan ku UoC na Kòrsou tabata brinda, pa nan prepará nan mes pa nan estudio na Hulanda. Na Hulanda mes universidatnan i Hogeschool nan a sera pa studiantenan den presensia i tur kos a sigui “online”.

E aña aki, te ainda kos ta mustra ku vários lo habri pa e hóbennan por tei den presensia, ounke tin algun ku a anunsiá kaba na e studiantenan ku lèsnan lo sigui “online”.

Ayera un biaha mas e situashon na airopuerto tabata basta emoshonante. Hóbennan ku ta Sali kas di nan mayornan. Lagando mama, tata i rumannan atras pa no papia tambe di amigunan, ku nan a bishita skol kuné pa hopi aña. E lágrimanan no por a keda kontené, pero tur kos ta pa un bon propósito.

Manera sra. Juliette Mendez di SSC a bisa anteriormente e promé buelo tabata 2:45 di trai mèrdia i 9 or di anochi e di dos.  Aña pasá tambe e studiantenan a sali riba mesun fecha pa Hulanda.

Tabatin un grupo di 239 studiante ku a hasi petishon e aña aki, pa bai sigui studia na Ulanda via di SSC. Ayera sinembargo ta 190 a bai. Tin diferente ku a bai promé i algun lo bai despues.

E aña aki atrobe e siudatnan mas gustá, mas popular pa studia ta Rotterdam, Amsterdam i Den Haag. Pa loke ta trata e merkado merikano, sra. Mendez a bisa   anteriormente ku debí na e pandemia, e situashon di rísiko haltu na Merka i Region, aña pasá e studiantenan no a bai. Esnan ku mester a bai aña pasa, a Sali na yanüari di e aña aki pa Merka. E aña aki tin 40 studiante pa studia den region. Otro paisnan ku studiantenan lo bai pa sigui nan estudio avansá ta Costa Rica i Colombia.

E kantidat di studiantenan pa region a baha drástikamente kompará ku den pasado ku ta riba di 100 studiante. Nota: Text skirbi den Papiamento fonetico di Corsou.