AIB: Soga y hospital riba e mesun liña pa operatiekamer nobo

ORANJESTAD – Soga (Stichting Ontroerend Goed Aruba) y Hospital ta riba e mesun liña riba ‘sala di operacion nobo’. Un siman despues cu e discusion a cuminsa riba e ‘controversia’ rond di salanan di operacion nobo na Hospital, esnan doño di e edificio, esta SOGA a bin dilanti. "Mi kier cuminsa na bisa cu nos no tin un diferencia di opinion cu Hospital den e proceso di expansion y renobacion di e edificio. Nos ta trahando como un team y nos tin e mesun meta". Asina Frendsel Giel, Presidente di AIB-Bank, cu ta maneha SOGA, a duna di conoce.

 PROYECTO

Giel ta repasa e situacion for di momento cu nan a drenta den e proyecto te cu awor. Aki Giel ta recorda cu a apunta SOGA como e instituto pa percura pa diseña, financia, construi y mantene e edificionan di Hospital durante casi 30 aña largo. Na tur e construccion den su totalidad ta costa 178.5 miyon florin, di cual Gobierno lo paga SOGA un suma pa aña pa huur e edificio. Na aña 2011, tempo cu Gobierno a otorga SOGA e proyecto grandi aki, a acorda cu tin 3 stakeholder, esta Gobierno, Hospital y SOGA. Cada un tin un responsabilidad pa carga den e proyecto, manera ta Gobierno cu mester a firma un acuerdo di huur riba termino largo, pagamento y percura pa e proceso di permisonan por cana mas lihe posibel; Hospital como operador di e edificio lo mester percura pa un "programa van eisen" den cual ta stipula tur locual cu mester renoba y expande; SOGA mester percura pa financiamento, busca contratista y percura pa mantencion.

INITIAL ASSESMENT 

Despues di e proceso aki, SOGA a contrata un arkitecto cu a haci un "initial assessment", a papia cu tur partido y ta aki Hospital a anuncia cu tin algun area cu no ta parti di e proyecto, entre otro e salanan di operacion. A bisa e tempo ey cu apenas a caba di renoba e salanan di operacion y cu nan lo por bay sigur pa 10 te cu 15 aña mas. Dor di esey a prepara e proyecto excluyendo e parti ey afo. No ta den SOGA su man pa determina kico si of no mester forma parti di e proyecto. Awor cu kier inclui e parti aki toch den e proyecto, ta pone cu SOGA mester a acerca su arkitecto atrobe pa bolbe haci un "assessment" y na December a pidi pa un plan di renobacion y ampliacion di e salanan di operacion. Dia 20 di januari ultimo e arkitecto a haci un presentacion di nan plan na SOGA, na Hospital y na Gobierno. Recientemente, dia 2 Februari tur hende a bin hunto atrobe pa discuti y un biaha mas e arkitecto mester a elabora riba su presentacion anterior. For di e proposicion aki a calcula e gastonan di construccion so na $7.200.000,=. Esaki no ta encera ekiponan ni mueblenan den e salanan di operacion, pasobra eseynan lo bini for di Hospital mes. Ta intencion pa e mesun compania cu ta haciendo e trabounan di construccion, pa nan mes haci e parti aki tambe.

SALA DI OPERACION

Segun Giel, ta intencion pa construi salanan di operacion nobo, banda di esunnan existente y manteniendo esunnan existente den operacion continuo. Esey riba su mes ta trece su retonan cune. Den caso cu acorda e plan, por cuminsa e trabounan otro luna ainda, pa por cumpli cu e rekisitonan impone dor di e compania di seguro, relaciona cu e salanan di operacion.

PLAN ACTUAL

E plan riba mesa actualmente ta pa renoba e mesun salanan di operacion, haci nan mas espacioso, construi un espacio pa oficina y un "Hybrid Cath Lab". Na tur Hospital tin casi 459 meter cuadra di espacio na salanan di operacion cu lo bira awor 669.1 M2. Actualmente tin un espacio sterilisa di 114.2 M2 cu lo bira 211.7 M2 despues di ampliacion. Den e proyecto lo inclui 3 camber di recuperacion mas.

SORPRESA

E hecho cu awor ta mencionando cu lo tin mas compania interesa pa construi e proyecto aki a cay di sorpresa, pasobra SOGA nunca a haya un oferta di ningun otro compania. "Niun rato so SOGA a haya un oferta di ningun otro compania. Pasobra SOGA no a ricibi cualkier informacion cu un compania lo a duna un prijs pa otro cu ta mas barata. Ohala cu nos por hay'e, pasobra SOGA no tin ningun interes pa neglisha un oferta mas barata contra e otro. Pero mientrastanto nos tin di sigui, pasobra tin un timeline mara na entrega e Operatie Kamer nan aki pa nan bin cla", asina Frendsel Giel a subraya. SOGA a sigura cu tur partido envolvi den e proyecto grandi aki, tin e mesun meta, tur kier traha den direccion di completa e proyecto aki exitosamente, di un manera responsabel y den e presupuesto. Directiva di SOGA tabata den contacto diabierna ultimo cu directiva di Hospital, den cual a confirma cu ambos tin e mesun interpretacion y determinacion pa termina e proyecto.

 SOGA

AIB-Bank hunto cu APFA a funda SOGA na aña 2005 cu e meta pa e ta un vehiculo di inversion pa tur fondonan di pensioen y companianan di seguro. Na aña 2005, SOGA a construi tres edificio pa Gobierno na balor di 60 miyon florin, den cual ta diseña, financia, construi y mantene edificionan pa un periodo largo. Gobierno ta uzando e mesun formula aki awor pa e 5 proyectonan di Hulpbestuurs Kantoor nan (MFA) den diferente districto rond di nos isla. Den caso cu yega na un acuerdo pa e renobacion y ampliacion di e salanan di operacion na Hospital, e inversion total pa e proyecto den su totalidad lo bira alrededor di 270 miyon florin. SOGA lo mester delibera ainda cu Gobierno, cu ta e instancia cu ta paga huur anualmente pa e edificionan, si lo aumenta e huur of lo amplia e periodo di huur y haci’e mas largo.