AAA: Aerolineanan ta sigui añadi mas buelo pa AUA pa winter

ORANJESTAD – Aruba Airport Authority N.V. (AAA) compania cu ta maneha Aeropuerto Internacional Reina Beatrix (AUA Airport), a anuncia e siguiente desaroyonan den e schedule aereo pa e temporada di winter.

Aeropuerto di Aruba su partner Delta Air Lines lo reinicia su servicio for di Boston pa Aruba cuminsando for di December 18, 2021 te cu Mei 3, 2022, riba Diamars, Diahuebs, Diasabra y Diadomingo. E schedule aki di 4 bes pa siman lo wordo opera pa un 738 aircraft (un total di 157 asiento). 

Delta su schedule completo pa e temporada di winter lo ta como lo siguiente: lo tin buelonan diario for di Atlanta pa Aruba, New York (JFK) pa Aruba y di Boston pa Aruba. E temporada di winter lo cuminsa oficialmente desde October 31, 2021. 

Un otro noticia positivo ta cu Canada a habri su frontera pa biahenan internacional. E tres carriers Canades a anuncia nan plan cu double seats for di Toronto pa Aruba pa e temporada di winter. 

E fechanan cu lo reinicia for di Canada pa Aruba pa e temporada di winter lo ta como lo siguiente: 

Sunwing lo cuminsa bula pa Aruba 1 bes pa siman desde September 6, 2021 y lo subi na 3 bes pa siman pa e temporada di winter

Air Canada lo cuminsa cu buelonan 2 bes pa siman desde October 3, 2021 y lo subi na 4 bes pa siman pa e temporada di winter

WestJet lo cuminsa bula 2 bes pa siman desde November 6, 2021 y lo subi na 4 bes pa siman pa e temporada di winter

Entre Januari, Februari y Maart 2022, AUA Airport lo tin 11 buelo nonstop (compara cu 6 buelo pa siman na 2019) for di Toronto. 

“E ultimo schedulenan aki ta e bon noticia cu AUA Airport a spera pe: “Nos ta sumamente contento pa wak un crecemento asina positivo den e trafico aereo. Aerolineanan ta mira e demanda den e mercadonan principal y ta sigui adapta nan schedule pa asina por carga e demanda. Esaki ta duna nos pais y mercado mas capacidad. Nos ta afortuna pa ta considera un di e destinacionan cu ta lidera e mercado y nos ta tuma e realidad aki hopi serio. Nos ta premira un temporada di winter hopi druk, cu un portfolio di diferente buelonan pa y for di Aruba”, asina Jo-Anne Meaux-Arends, Air Service Development Manager di Aruba Airport Authority N.V. a bisa. 

Pa e ultimo schedule di buelonan, por bishita www.airportaruba.com y click riba Flight Schedules.