A detene doble cantidad di persona na parada San Nicolas

SAN NICOLAS – Polis a detene doble cantidad di persona na parada San Nicolas. Na tur 150 Polis a traha activamente, sea den e departamento uniforma, e ekipo di Mobiele Eenheid, unidad K-9, riba brommer, unidad riba bicicleta, Recherche, departamento di droga, seccion administrativo y Cuerpo Especial Arubano cu ta encarga cu transporte di detenidonan. E cabes di e parada a yega su final pa 5:50pm mientras cu e "Last Lap" a yega final pa 7:15pm. E parada a cana riba un velocidad trankilo, dunando e participantenan amplio oportunidad pa por gosa di nan carnaval, mescos ta e publico banda di caminda cu tabata aplaudi e creatividad y entusiasmo di e carnavalistanan.

No obstante e bon ambiente, semper tin un grupo cu ta bini cu menos bon intencion of cu no por controla nan mes na un dado momento. Specialmente pa e grupo chikito ey Polis a aplica e formula di "Faya bo Haya". Den e cuadro ey, banda di e poder adicional cu Ministerio Publico a otorga Polisnan pa e fin di siman di carnaval den cual por a tene accionnan di listramento preventivo, a detene 31 sospechoso. Nan hunto a paga Afl. 8.300,= na multa pa por a sali for di prizon mesora. E cantidad di ta casi dobel di aña pasa, unda a detene solamente 16 sospechoso!

E edad di e sospechosonan a varia for di 14 aña te cu 58 aña. E delitonan cometi tambe a varia for di buracheria publico, posesion di cocaina, marihuana y pildernan di XTC, posesion di arma blanco (sker), no sigui ordo di Polis, pelea, insulta un Polis den ehecucion di su funcion y mas. E multanan a cuminsa for di 50 florin te cu 1100 florin pa un sospechoso cu a comete multiple delito. E accionnan di control no a limita nan mes solamente rond di e ruta di parada di carnaval na San Nicolas, pasobra e Polisnan riba brommer tambe a tene control riba caminda grandi. A para un cantidad di auto cu tabata actua straño, di cual a gara 5 chauffeur bou di influencia di alcohol.