Aruba a yega y pasa 200 caso activo positivo atrobe di Covid19

ORANJESTAD – Aruba a yega y pasa 200 caso activo positivo di Covid19 diadomingo. Segun e cifranan difundi, diadomingo Aruba a raporta 28 caso mas positivo di cual 19 ta residente y 9 ta no residente. Como cu no ta dunando informacion diario mas extenso, no por saca afor cuanto e positivity rate ta, pero ta confirma cu e cifranan ta kedando halto y cu esaki ta preocupante. Diasabra caba e portal aki den un raportahe extenso a informa cu tin un wave nobo posible na caminda y esaki debi na e variante Delta. Esaki ta percura pa un contagio mucho mas rapido y entre hobenan primordialmente. Tambe esaki ta sosodiendo mas entre esnan cu no ta vacuna, mas tanto. Tanto prome minister demisionario como minister di Salud demisionario diasabra a confirma cu e situacion ta di preocuacion y cu kier evita un siguiente ola. E pediatra conoci Wicha Wever cu ta traha den hospital, a bati alarma caba for di diabierna pa un ola nobo y gobernantenan ta di acuerdo cu e posibilidad hopi real caba.