Experto medico local ta alerta cu e siguiente ola di Covid19 ta yegando Aruba

ORANJESTAD – “Aruba, nos siguiente wave di Covid(19) ta na caminda, maske un gran parti di nos poblacion a vacuna”.  Asina e pediatra di Aruba dr Wicha Wever a pone riba su pagina di Facebook diabierna. E ta traha den hospital y ta conoce e situacion interno y ta hopi critico riba e situacion for di comienso. E cifranan pa Aruba di contagio ta aumentando atrobe manera cu e portal aki a raporta e siman aki caba.  E pediatra tambe tabatin su mensahe: “Lastimamente tin mucho hopi hende cu no a vacuna” Wever ta sigui bisa, cu por nifica pe, cu ‘ta suficiente pa yena Hospital un biaha mas”. Y mas pio, e efecto di esaki. “Si esey pasa, ta medida y lockdown atrobe”. 

GOBERNANTENAN

Gobernantenan di Aruba a confirma e pensamento aki pa e portal aki, esta cu e siguiente ola ta na caminda pa Aruba. Prome minister demisionario Evelyn Wever mes a mustra su preocupacion na e portal aki diasabra mainta.” Mi ta hopi preocupa cu un otro ola di Covid19 na Aruba” e mandatario a bisa.” Pesey mi ta papia y sigi papia. Gobierno no por cuida bo. Cada persona mester cuida su mes y su famia” e mandatario a finalisa bisando. Minister demisionario di Salud Dangui Oduber tambe a mustra su preocupacion diasabra y ta conciente cu un otro ola di coronavirus ta na caminda.  “Nos ta preocupa cu e aumento di casonan di e variante Delta y netamente pa evita cu e casonan ta sigui aumenta y cu e peliger cu mas hende por bira malo y wordo hospitalisa of por fayece, nos mester keda enfoca riba e beneficionan di e vacuna”e mandatario a reacciona pa e portal aki diasabra. “E ta prueba cu si bo ta vacuna bo ta hopi mas mihor protehi den comparacion cu esnan cu no a tuma e vacuna”. E mandatario tin miedo cu si nos no sigui cuida, cu cos enberdad por empeora.” Nos tawata bayendo den bon direccion den tur sentido pero e situacion por cambia si nos descuida y no vacuna”, e  mandatario a sigui bisa. Segun e ultimo cifranan, 68% di esnan entre 18 y 59 anja ta vacuna, mientras cu esnan di 60+  ta 73.3% ta vacuna. E grupo di persona entre 12 pa 17 anja apenas 21.6% ta vacuna. Pues falta ainda pa vacuna. Y segun e cifranan, riba 85% di e casonan di contagio ta entre esnan no vacuna. 

AUMENTO

Manera cu e portal aki a raporta diabierna, e cantidad di caso pa un solo dia tabata 32 diabierna cu ta esun mas halto den 3 luna di tempo desde 22 di april ultimo. Y e cifra a cuminsa subi for di siman pasa diabierna. Ta premira cu e cifra lo sigui subi asina, y cu e responsabel pa esaki ta e variante Delta cu ta 80% caba di e casonan nobo.