Corte ta dicidi otro luna si reconteo di voto por tuma lugar ainda

ORANJESTAD – Otro luna huez lo dicidi si por tin un reconteo di e votonan di e eleccion Parlamentario di dia 25 di juni 2021.  Un total di 3 votador, cu ta miembro di partido AVP a cuminsa e caso como votador contra pais Aruba (lesa:gobierno di Aruba) pa e hecho cu no kier a haci un reconteo di e votonan.A pidi specificamente reconteo di a. tur voto, sino b. reconteo di votonan invalido pa no ta mucho trabou. Segun abogado Desiree Croes, a kere inicialmente cu e caso lo no a sigui, debi cu (awor) ex presidente di Conseho Electoral (CE) Glenn Thode a duna ordo pa destrui e stembiljetten di e eleccion. Y si esaki tabata e caso, lo no tabatin sentido pa continua cu e caso. A resultado sinembargo cu e presidente nobo di CE a opta pa no destrui e biyetenan aki. Esey a pone cu e caso por a sigui. 

ORDE MAATREGEL

Ora cu na inicio partido AVP a pidi huez van de Leur pa duna nan un orde maatregel cu ta evita pa destrui e stembiljetten, pendiente e caso, e huez a rechasa e peticion ey. E peticion pa e caso a sigui, pero toch e abogado awe mainta a puntra e huez en cuestion si tabatin sentido pa ainda sigui e caso. Sigur si e vice presidente di CE Hubert Maduro a declara cu ela duna ordo pa destrui e stembiljetenan dia 9 di juli. Ora cu presidente nobo di CE a hiba palabra, el a declara cu   e a scohe pa no destrui e stembiljetenan ainda, pa asina warda te ora tin un desicion den e caso aki.

VERSION CROES

Segun abogado Croes, a trece varios punto dilanti, e.o. cu art. 84 lid 2 ta duna e votado e oportunidad pa pidi un reconteo ora e resultado di eleccion bira conoci. Segun Croes, pais Aruba a keda pega na art. 77 cu ta bisa cu mester haci esaki e anochi di eleccion mes na e stembureau, siendo cu 84 ta un ‘vangnetartikel’. Tambe nan a trece dilanti e caso Davydov and others v.s. Russia (2017). Eyden ta duna un atencion special na e control despues di eleccion, cu esey mester ta salvaguardia. Huez a cera e tratamento di e caso y lo dicta sentencia dia 11 di augustus proximo.