Awe Aruba a registra e cantidad mas halto di caso di Covid19 pa un dia den ultimo tres luna!!

ORANJESTAD – Awe Aruba a registra e cantidad mas grandi di caso positivo riba un dia di Covid19 den tres luna di tempo. E cantidad registra awe segun Crisis Team tabata 32 riba un solo dia. Ultimo biaha cu a registra e cantidad aki pa un solo dia tabata 22 di April ultimo. Su siguiente dia, (23 di April) a registra 34 caso pero djey el a cuminsa baha, y a yega te zero (0) caso riba 27 di juni ultimo. Di e casonan di awe, 14 ta turista y 18 ta residente. 'Positivity rate' bou nos residentenan ta 16.7%. Di e 18 residentenan positivo awe 5 ta vacuna completamente y 13 no ta vacuna of no ta vacuna completo. Casonan activo pa awe ta 158, edad promedio di esnan positivo ta 31 aña y cantidad di fayecido relaciona cu COVID-19 ta 109. Ta hopi importante pa remarca cu e categoria di edad cu recientemente mas ta test positivo pa COVID-19 ta e categoria di edad entre 18 cu 29 aña.

JULI COS A DAÑA ATROBE

Na juli, a cuminsa registra pa siman unda cu tabata registra 4 pa dia e prome siman. E di dos siman esaki a bira 6 pa dia. Pero ya pa fin di e siman ey, cos a coi cabez ariba y a raporta no menos cu 13 riba un solo dia. Siman a habri y atrobe esaki a sigui asina. Diamars ultimo 13, diaranson 15, diahuebs 21 y awe 32. Pues definitivamente e cantidad di casonan ta aumentando y cu ne, e cantidad di casonan hospitalisa. Riba peticion di noticiacla na prome minister diahuebs, a pidi pa cuminsa duna cifra diariamente atrobe y parce cu awe esaki a wordo cumpli pasobra no ta papia di cifra di siman, sino di dia.