Parlamento porfin a cuminsa trata presupuesto 2021 diabierna mainta

ORANJESTAD – Tratamento di presupuesto di pais Aruba pa 2021 a cuminsa diabierna mainta, 11 luna laat, cu un problema. Esaki pasobra a compronde cu e presidente di e Parlamento, Edgar Vrolijk lo a cera e lista di firma di orador tempran. Esey a pone cu algun orador a keda afo y no a basila pa reclama esaki. Partido RAIZ a mustra cu nan a hala atencion di e presidente y pidi pa habri e lista atroba pa inscribi, loke a sosode tambe.  Mientrastanto e presidente a sigura cu asina mes, aunke cu cierto personanan no a firma e lista (e.o. Mervin Wyatt Ras), toch a haya oportunidad pa hiba palabra. Esaki pa evita problema despues. Despues partido AVP su fraccion a bandona e sala como forma di protesta y a anuncia esaki despues den un conferencia di prensa. E reunion ta continua den curso di dia y ta sigui dialuna pa final di dia aproba esaki. Ta conoci cu un presupuesto di pais Aruba mester ta entrega mas tarda 1 di September di e aña anterior. Leynan nobo a pone cu pa 15 december di e aña anterior, e colegio di supervision financiero CAft mester tin e presupuesto aproba den su poder pa analisa esaki. Falta den esaki por conduci na un instruccion di parti di RMR riba conseho di CAft. Esaki sinembargo no a sosode ainda debi cu segun CAft, cada bez e gobierno na turno tabata presenta un ‘indicacion di kico ta pasando cu e presupuesto’ y esey tabata suficiente. Potret cortesia Aribaaruba Media