Detencionnan durante ultimo parada di carnaval, mitar di aña pasa

ORANJESTAD - E aña aki Polis a detene mita di e cantidad di sospechosonan durante carnaval, si compara cu aña pasa. Esaki segun informacion cu polis a suministra despues di e ultimo parada di carnaval awe. Tabatin 175 polis riba pia diadomingo ultimo. E grupo ta encera Polisnan uniforma, riba brommer, riba bicicleta, cu cachonan K-9, den Mobiele Eenheid, Recherche, departamento di droga, personal administrativo y Cuerpo Especial Arubano cu a percura pa transporte di detenidonan. Hunto a percura pa mantene un balans entre un grado halto di tolerancia, pero toch manteniendo orden publico. A tene masha cuenta cu tabata e ultimo evento grandi di carnaval, den cual tanto e carnavalistanan como e publico banda di caminda ta un poco mas alegre cu normal.

Asina mes, ora cu surpasa e grado di tolerancia y bira un peliger pa orden publico, a actua mesora. Comparando cu aña pasa, unda a detene 74 sospechoso, e aña aki Polisnan a detene 31 sospechoso. E edadnan a varia for di 19 aña pa 46 aña. E multanan cu mester a paga pa sali di prizon a alcansa Afl. 12.250. Esun di mas abou tabata di Afl. 50,= florin mientras cu esun di mas halto tabata di Afl. 1200,= pa insulta Polis y un mix di varios otro delito mas cometi durante un detencion na final di parada den Caya Milio Croes. E parada grandi di carnaval a sali exactamente 12:00pm y e cabes a yega final pa 5:00pm, manera planea for di antemano. E "Last Lap" a yega final pa 6:25pm na Aruba Entertainment Center na Dakota.