Aruba a luci na apertura di Weganan Olimpico na Tokyo

TOKYO – Dilanti un audiencia di casi 5 biyon hende rond di mundo, e delegacion di Aruba na Weganan Olimpico na Tokyo a profila nan mes diabierna anochi (ora di Tokyo) durante e ceremonia di apertura. Cu atletanan Mikel Schreuders y Allyson Ponson cargando e bandera di Aruba, e delegacion den su uniform unico, a luci sigur y a pone tur Arubiano sinti orguyoso. Loke tambe tabata un bunita momento ta ora cu e camera a gara nos propio Nicole Hoevertsz cu e siman aki ainda a bira un di e VP di IOC, ta para bati man den e tribuna di honor ora cu Aruba tabata presenta su mes. Chikito den tamaño, pero sigur orguyoso e ekipo por ta pa ta presente y duna cara na mundo. Sigur e uniform nobo diseña pa nos propio diseñador Magaly Maduro, tambe a luci grandemente. Comentarionan riba rednan social tabata hopi. Pabien Aruba y exito na e ekipo cu ta representa nos isla na Tokyo. Screenshot cortesia NOS.